Díli, 24 Juñu 2025 – Iha preparasaun ba XII Jogos Desportivos da Comunidade dos Países de Língua Portuguesa (CPLP) ne'ebé sei akontese iha Timor-Leste husi loron 17 to'o 27 Jullu 2025, Governu Timor-Leste, liuhusi Ministériu Juventude, Desportu, Arte no Kultura (MJDAK), konfirma ona finalizasaun aranjamentu akomodasaun ba delegasaun sira no loke ofisialmente formasaun ba voluntáriu sira.

Akomodasaun no Lojístika Finalizada

MJDAK, liuhusi Diretór Jerál Desportu, Sr. João Rodrigues, hatete katak fasilidade akomodasaun hotu-hotu prepara ona ba simu delegasaun sira husi nasaun luzófonu. Otél sira ne’ebé identifika atu fó apoiu inklui:

• Hotel Golgota
• Novu Turizmu
• Hotel Excelior Resto
• The Beach Garden / The Plaza
• Hotel Timor
• Hotel Ramelau

Otél sira ne’e sei simu delegasaun husi:

• Angola
• Cabo Verde
• Guiné-Bissau
• Guiné Equatorial
• Moçambique
• Portugal
• São Tomé no Príncipe
• Timor-Leste (nasaun uma-nain)

Delegasaun Guiné-Bissau previstu atu to’o iha loron 14 Jullu, enkuantu ekipa seluk sei to’o entre loron 15–16 Jullu.

“Fasilidade hotu-hotu prepara ona atu simu ita-nia bainaka internasionál sira,” — João Rodrigues, Diretór Jerál Desportu.

Voluntáriu Hahú Treinamentu Intensivu

Koordenadór Jerál ba Jogos CPLP 2025 no Sekretáriu Estadu Arte no Kultura, Sua Exelénsia Jorge Soares Cristóvão, ofisialmente loke formasaun ba voluntáriu hamutuk 177. Treinamentu ne’e sei hala’o durante loron tolu iha Salaun MSSI, Kaikoli – ho konténudu kona-ba:

• Atendimentu emerjénsia ho parte saúde
• Komunikasaun no kolaborasaun
• Seguransa no protokolu baziku

Formasaun ne’e fasilita husi tekniku ministeriál sira ho esperiénsia relevante. Loron dahuluk foka ba primeiru sokoru, hala’o husi ekipa Ministériu Saúde.

Voluntáriu sira ne’e kompostu husi estudante sira husi 7 universidade iha Díli, seleziona liuhusi prosesu rigorozu hala’o husi Seksaun Voluntáriu MJDAK no koordenasaun ho Ministériu Ensinu Superiór, Siénsia no Kultura (MESSK).

Formasaun loke ho partisipasaun Diretór Jerál Desportu, João M. Rodrigues, Diretór Jerál Juventude, David Tomás De Deus, Diretór Jerál Arte no Kultura, Gil Paulino de Oliveira, hamutuk ho ekipa organizadora.

Dadus Relevante Jogos CPLP 2025

Data: 17–27 Jullu 2025
Partisipante: ~535 Atleta (kontajen provizóriu)
Voluntáriu: Besik 200, ho 177 iha formasaun inisiál
Nota Importante: Brazíl seidauk konfirma partisipasaun iha edisaun Jogos CPLP ida-ne’e.

#MídiaMJDAK