DÍLI, 13 Juñu 2025 – Governu Timor-Leste, liuhusi Ministériu Finansas, ohin realiza Jornada Orsamentál 2026 ho lema “Otimiza Rezultadu sira ho Despeza Realístiku sira”. Atividade importante ne'e, hanesan parte ida husi kalendáriu preparasaun Orsamentu Jerál Estadu (OJE) ba tinan 2026, hala'o iha Auditóriu Kay Rala Xanana Gusmão, Ministériu Finansas, Aitarak Laran, Díli. Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, mós partisipa iha jornada ne'e.

Jornada Orsamentál 2026 ne'e konvida membru Governu Konstitusionál Da-Sia tomak, instituisaun Estadu sira, sosiedade sivíl, no setór privadu, ho objetivu atu permite Governu analiza prioridade nasionál sira no define senáriu tetu fiskál ba ezersísiu tinan 2026 nian.

Programa ne'e hahú iha tuku 8:30 dadeer ho rejistu partisipante sira, tuirmai ho toka Inu Nasionál Timor-Leste. Iha tuku 9:10, Ministra Finansas simu ofisiálmente partisipante sira, antes ko'alia diskursu abertura badak husi Sua Exelénsia Primeiru Ministru, Kay Rala Xanana Gusmão.

Hahú iha tuku 9:40, iha aprezentasaun oin-oin husi Ministériu Finansas, inklui panorámika kona-ba kontestu makroekonómiku no sosiál, análize dezempeñu reseita sira nian iha tinan hirak liubá, no panorama fiskál. Aprezentasaun sira-ne'e kontinua to'o tuku 11:30.

Tuirmai, iha intervensaun espesífika sira kona-ba dezempeñu no dezafiu prinsipál sira ne’ebé hasoru husi setór finanseiru no privadu, ho partisipasaun husi Banku Nasionál Komérsiu Timor-Leste (BNCTL) no Kámara Komérsiu no Indústria Timor-Leste (CCITL).

Hafoin deskansa ba almosu, sesaun hahú fali ho aprezentasaun foun tolu husi Ministériu Finansas, ne'ebé foka liu ba dezempeñu despeza sira nian iha tinan hirak liubá, despeza obrigatória sira, no senáriu fiskál indikativu ba tinan 2026. Husi tuku 3:00 to’o tuku 5:15 lokraik, iha espasu diskusaun entre partisipante sira. Sesaun jornada orsamentál ne’e remata iha tuku 5:30 lokraik.

#MídiaMjdak