Dili, 28 Janeiru 2025 – Sua Exelénsia Ministru Juventude, Desportu, Arte, no Kultura (MJDAK), Nelyo Isaac Sarmento (NIS), hala’o enkontru produtivu ho Koordenadór Liga Futeból Timor-Leste (LFTL), Octavio Da Conceição, ho nia ekipa iha Salaun Magna, MJDAK Lecidere, Dili.

Enkontru ne’e nia foku primáriu mak ko’alia kona-ba progresu Kongresu LFTL nian no planu estratéjiku sira hodi organiza liga futeból ne’ebé kompetitivu iha Timor-Leste. Koordenadór LFTL subliña importánsia atu estabelese órgaun ezekutivu ida ne’ebé legál no estruturadu hodi garante katak atividade liga nian aliña ho regra no programa sira ne’ebé konkorda ona.

“Ohin, ami hasoru malu ho Sua Exelénsia Sr. Ministru hodi aprezenta progresu Kongresu LFTL nian no diskute kona-ba organizasaun liga kompetitivu ida. Órgaun ezekutivu ida ne’ebé estruturadu ho di’ak no rekoñesidu legalmente esensiál atu garante katak atividade liga nian hala’o ho efetivu no tuir matadalan ne’ebé estabelese ona”, tenik Octavio Da Conceição.

Nia esplika liután katak, komisaun organizadora prepara hela ba Asembleia Jerál Liga Futeból Timor-Leste nian, ne’ebé marka ona ba fulan-Fevereiru 2025. Asembleia ne’e sei fó tempu ba klube sira atu halo preparasaun no ba kandidatu sira ne’ebé iha interese atu deklara kandidatura ba prezidénsia Timor-Leste nian -Liga Futeból Leste.

Governu espresa apoiu maka’as ba esforsu hirak ne’e. Tuir Diretór Jerál Desportu (DJD), João M. Rodrigues katak, governu apresia inisiativa ne’e, partikularmente tanba atividade liga paradu tiha ona durante tinan balun nia laran. “Governu valoriza esforsu LFTL nian hodi reativa fali liga ne’e. Hafoin kongresu no eleisaun ba prezidente, ami sei servisu besik ho LFTL, FFTL, no parte interesada sira seluk atu asegura liga nia susesu,” afirma João.

Enkontru ne’e hetan partisipasaun husi Diretór Jerál Desportu, Diretór Nasionál, Xefe Gabinete MJDAK, asesór sira, no ekipa LFTL, hodi reflete kompromisu kompartilladu hodi revitaliza futeból iha Timor-Leste.

#MédiaMjdak