DÍLI, 10 Juñu 2025 – Estudante na'in 26 husi Dili International School (DIS), akompaña husi Profesór Pedro Correia, Profesór Desportu Gilberto Zeca no Profesóra Echo husi Stchub, ohin hasoru malu ho Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento. Enkontru kortejia ne'e hala'o iha salaun Magna MJDAK, Lecidere, Díli.

Tuir Profesór Pedro Correia, objetivu prinsipál husi sorumutu ne'e maka atu rona no kompreende polítika governu nian kona-ba dezenvolvimentu desportu, liuliu ba labarik sira iha eskola no lala'ok desportu jerál iha Timor-Leste. "Ami mai atu rona saida mak governu nia hanoin no polítika liga ba atividade desportu ba labarik sira iha eskola no lala'ok desportu iha Timor-Leste, tanba ami husi profesór desportu hamutuk ho estudante sira maioria pratika mós desportu iha ami-nia eskola," dehan Profesór Pedro Correia.

Iha biban ne'e, Sua Exelénsia Ministru Nelyo Isaac Sarmento (NIS) hatete katak Guvernu liu husi Ministériu  iha obrigasaun atu kria polítika hodi fornese kondisaun ba ema hotu atu bele pratika desportu. "Kona-ba desportu iha Timor-Leste, ita hasoru difikuldade barak, primeiru la iha fasilidade desportu iha eskola sira, no segundu tanba la iha atividade desportu ne'ebé regulár maka joven sira abandonu. Ida-ne'e kontinua bebeik, ita la bele sai atleta ne'ebé di'ak," nia esplika.

Ho nune'e, Ministru Nelyo Isaac afirma katak Estadu no Governu sei prepara kondisaun sira hodi kria atividade regulár ba joven sira atu pratika desportu. Ministériu nia atensaun foka ba pontu tolu: fasilidade desportiva, kria atividade regulár ba kada eskola, no prepara tempu atu realiza atividade sira ne'e. Maibé, Governu la bele la'o mesak, presiza iha kooperasaun ho federasaun desportiva sira, tanba iha Timor-Leste iha modalidade hamutuk 23 ne'ebé sai parseiru dezenvolvimentu ho Governu.

Governante ne'e mós subliña katak Timor-Leste, nu'udar nasaun ki'ik, tenke hili modalidade ne'ebé famozu no joven sira gosta. Modálidade sira ne'ebé sei sai prioridade ba investimentu Governu nian inklui Futeból, Boxing, Atletizmu, Taekwondo, Basketból, no Voleyból. Liuhusi desportu eskolár ne'ebé kada tinan realiza kompetisaun, Governu sei tau sistema no regras atu bele hetan atleta sira-nia kualidade di'ak hodi sai kampionaun iha nível munisípiu no reprezenta nasaun iha mundu.

Ministru NIS reforsa katak Timor-Leste mós iha atividade nasionál ne'ebé envolve munisípiu hotu hodi halo kompetisaun no seleksaun ba atletas. Atleta timoroan sira mós partisipa iha ajénsia rejionál hanesan ASEAN no CPLP, hodi partisipa regularmente iha ASEAN Games, SEA Games no Jogos CPLP.

Iha atividade ne'e, Ministru MJDAK akompaña husi Xefi Gabinete MJDAK, Egas Baros Guteres Godinho, no Diretór Nasionál Desportu Para Todus (DNPT), Egas Freitas da Rosa, hamutuk ho profesór no estudante sira husi Dili International School.

#MídiaMJDAK