Díli, 19 Fevereiru 2025 – Kordenadór Jurídiku husi Ministériu Finansas, Sr. Isac Menezes, aprezenta Dekretu Lei n.° 43/2024, datadu 20 Dezembru 2024, kona-ba Ezekusaun Orsamentu Jerál Estadu (OJE) ba tinan 2025, ba lideransa no funsionárius Ministériu Juventude, Desportu, Arte no Kultura (MJDAK). Atividade ne’e realiza iha Salaun Xanana Sport Center, Dili, ho objetivu atu hatene klarifikasaun ba regra teknika sira ne’ebé guía ezekusaun orzamental.

Iha aprezentasaun nian, Sr. Isac Menezes esplika katak Lei Dekretu Ezekusaun Orsamentál fó klaridade kona-ba atribuisaun no kompeténsia ba titular orgaun sira, hanesan Direktór Jerál, Sekretáriu Estadu no Ministru, ne’ebé lei atribui poder atu hala’o ezekusaun ba orzamentu públiku.

“Lei determina katak titular orgaun kargu diresaun sira ne’ebé lei mak atribui poder espésifiku, sei sai responsavél hodi hala’o parte iha ezekusaun orzamental. Delegasaun kompeténsia presiza husi despaixu eskritu husi superiór máximu, no despaixu ne’e tenki públika iha Jornal da República,” hateten Sr. Isac Menezes.

Kordenadór Jurídiku mós esplika aspéktu tékniku importante sira, inklui:

• Sistema informatika ba kontrolo despeza liuhusi Invoice Tracking System, atu aumenta transparénsia.
• Limite tempu ba autorizasaun pagamentu, ne’ebé tenki hela iha loron 27 fulan Dezembru tinan fiskál nian.
• Movimentu osan tenki kontribui ba programa no objetivu sira ne’ebé planeadu iha Planu Anuál nian.

• Regras ba Reserva Kontijénsia, ne’ebé uza ba situasaun urjente deit, no sei justifika no valida ho kriteriu ne’ebé defini ba asesu reserva.
• Regras kona-ba despesa viajen, no subvensaun públika ba apoyu parseiru sira, ne’ebé tenki iha justifikasaun presizu.

Workshop ne’e partisipa husi: Kargu Diretór Jerál, Diretór Nasionál, no Chefia Departamentu sira, Funsionariu MJDAK no Sekretáriu Estadu Arte no Kultura (SEAK), Parseiru institusionál sira relasionadu ho admininstrasaun finanseira no programátika.

MJDAK kontinua fó prioridade ba kapasita no empoderamentu lideransa institusionál nian, liuhusi klaridade ba regra no prosedimentu ezekusaun orzamentu públiku, hanesan parte ba boa governasaun.

#MídiaMJDAK