DILI, 31 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa no hato'o palestra ba joven Katólika na'in 130 iha ámbitu "Assembleia Fe-Christu Vivit Cristo Moris no Nia Hakarak O Moris" Turno IV-2025. Atividade ne'e hala'o iha Lahane Osidental, Díli.

Iha nia diskursu, Ministru Nelyo Isaac Sarmento (NIS) hato'o dezafiu no esperansa ba joven sira, ne'ebé mai husi fiar an no fiar ba Maromak, atu bele implementa iha sosiedade nia laran. NIS rekoñese katak joven Timoroan, ne'ebé ohin balun aprezenta ona problema balun, infrenta dezafiu oioin. Ministru salienta katak Timor-Leste ne'e hanesan rain ida ne'ebé ema ho fuuk mean, fuuk kribun, no fuuk mutin kahur malu, ida-ne'e nu'udar orgullu boot no grasa Maromak nian, ne'ebé halo originalidade ida-idak sai furak liu tan.

Ministru NIS fó atensaun katak Timor-Leste iha joven barak tebes, kuaze 75 pursentu husi 1.4 milloens populasaun, ne'ebé idade produtivu atu halo buat furak ba nasaun. Maibé, nia mós alerta kona-ba dezafiu ne'ebé komesa besik mai, sita Amu Papa Francisco nia liafuan kona-ba "lafaek sira ne'ebé atu mai estraga ita-nia kultura", hanesan avizu ida ba situasaun agora daudaun iha Timor-Leste.

Ministru MJDAK espresa preokupasaun kona-ba joven sira-nia hahalok balun ne'ebé halo nasaun triste tanba falta respeitu ba inan-aman, espesialmente liuhusi influénsia teknolojia no media sosiál. "Joven barak mak la respeitu inan-aman, tanba media sosiál mak sai fonte importante liu iha sira-nia vida moris loron-loron nian, hodi hariku sira-nia kapasidade ida-ne'e sala," nia hateten. Nia mós krítika joven balun ne'ebé konsidera media sosiál nu'udar sira-nia "Maromak", ne'ebé haluha tiha misa no ko'alia ho inan-aman la respeita.

Kona-ba dezafiu iha Estadu, Ministru NIS rekoñese katak Ministériu ne'ebé nia lidera mós hasoru kestaun, maski públiku barak kestiona katak MJDAK di'ak no fó apoiu. Nia enfaze atu kaer metin Maromak nia liafuan "fó liman loos, liman karuk labele hatene", hodi kontra hahalok ne'ebé buka hatene hotu segredu instituisaun nian, ne'ebé la tuir kultura Timoroan nian, maibé hanesan nasaun Europa no Amérika sira. Nia mós kompara moris iha Timor ne'ebé uza ai sunu ho nasaun boot sira ne'ebé uza ahi ho eletrisidade, no reflete kona-ba realidade Artificial Intelligence (AI) ne'ebé mós Amu Papa Leão XIV kestiona.

Iha finalizasaun nia diskursu, Ministru NIS enkoraja joven sira atu aproveita tempu ida-ne'e hodi aprende no diskute, mantein haksolok nafatin, no hanoin ho pozitivu, hodi "tau ses buat negativu" husi sira-nia kakutak laran.

Iha okaziaun ne'e, Prezidente Komisaun Nasionál Juventude Katólika Timor-Leste (KNJK-TL), Padre Indra Francisco Nascimento Tey Seran, kontempla prezensa hotu-hotu iha fatin ne'e, refere ba Nain Feto Maria nia vizita ba Santa Isabel. Nia agradese Ministru MJDAK nia prezensa, hanesan "Nain Feto hiit Aan Mai Iha Fatin nee".

Padre Indra esplika katak atividade ida-ne'e mak Formasaun Espirituál Umana, ne'ebé kada tinan Komisaun Nasionál elabora hamutuk ho diosezanu tolu: Komisaun Juventude Katólika Arqidioseze Díli (KOJUKAD), Komisaun Juventude Katólika Baucau (KOJUKBAC), no Foinsa'e Katólika Dioseze Maliana (FOKADIMA). Ba turnu IV nian ne'e, Komisaun simu formandu hamutuk 130, kompostu husi 27 husi KOJUKAD, 36 husi KOJUKBAC, no 31 husi FOKADIMA, hamutuk ho fasilitadór no responsavel sira.

Amu Indra mós sita Evanjellu husi São Marcos "dever ba Maromak no na'in ulun sira", nu'udar konfiansa ne'ebé Maromak tau ba sira atu organiza no halo servisu ba vida komunidade, hodi sai autoridade definifikasaun ida. Nia deskreve fatin Lahane nu'udar istória ba ema hotu, ho ai-horis no manu sira ne'ebé kanta no akompaña foinsa'e sira iha situasaun difisil. "Maski Jesus Kristu simu terus iha Jerusalém, Nia konvida ita hotu tenke sa'e ba foho, halo aproximasaun, hader, korajen, hasoru na'in Maromak maka Foinsa'e Kreda, ba nasaun nia di'ak, maske buat ne'ebé ki'ik, maibé ho domin boot tebes," dehan Amu Indra.

#MídiaMJDAK