DÍLI, 30 Junu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, nu’udar Prezidente Komisaun Nasionál Desportu (KND), prezide reuniaun ordináriu ho membru komisaun nian iha Salaun Magna MJDAK, Lecidere, Dili.

Reuniaun ne’e hala’o iha konteksu partilla informasaun relevante kona-ba atividade desportiva nian, inkluí preparasaun Timor-Leste ba XII Jogos Desportivos CPLP 2025, ne’ebé sei akontese iha Dili husi loron 17 to’o 27 Jullu 2025.

Iha liafuan abertura, Prezidente KND hatete katak:

"KND tenke kontinua halo reuniaun hamutuk, atu partilla informasaun sira ne’ebé importante tebes, hanesan preparasaun Jogos CPLP no asuntu emerjente seluk, inklui kriasaun Autoridade Anti-Dopajen ba Timor-Leste."

Ministru Nelyo subliña katak Timor-Leste deit mak membro iha rejiaun sudeste aziátiku ne’ebé seidauk iha Autoridade Anti-Dopajen, maski rekomendasaun husi reuniaun mundial iha Qatar, ne’ebé apela ba nasaun hotu-hotu atu hari instituisaun ida ne’e.

"Se Timor-Leste la hari autoridade refere, desportista sira bele la hetan validasaun internasionál no labele partisipa iha kompetisaun ofisiál sira," nia hateten.

Sekretáriu Ezekutivu KND, Cesarino da Silva, aprezenta mos estatutu proposta ba autoridade anti-dopajen nian, no fó dadus kona-ba ligasaun KND ho federasaun sira, inklui organizasaun kompetisaun Liga Futebol Timor-Leste nian.

Enkunatu, Diretor Jerál Desportu, João Rodrigues, hatudu klaru preparasaun organizativu ba Jogos CPLP, no fó informasaun kona-ba partisipasaun nasaun CPLP sira. Pais sira mak konfirma partisipa, tanba eventu refere iha visibilidade internasionál boot.

"Nasaun CPLP balun di’ak liu ona iha organizasaun kompetisaun, nune’e sira sei konkore ba medailla. Brazil sei la partisipa," nia dehan.

Reuniaun refere partisipa husi Prezidente CDTL, membru Komisaun Nasionál Desportu, Asesor Juridiku MJDAK, Diretor Jerál Desportu no ekipa ténika sira husi KND rasik.

#MídiaMJDAK