DÍLI, 26 Juñu 2025 – Ministru Juventude, Desportu, Arte no Kultura (MJDAK), Sua Exelénsia Ministru Nelyo Isaac Sarmento, ohin ensera ofisialmente Formasaun ba estudante voluntáriu hamutuk 206. Formasaun intensa durante loron tolu ne'e ho objetivu atu prepara voluntáriu sira ba partisipasaun iha eventu XII Jogos CPLP 2025, ne'ebé sei akontese iha Timor-Leste. Atividade enserramentu ne'e hala'o iha salaun Ministériu Solidariedade Sosiál no Inkluzaun (MSSI), Kaikoli, Díli.

Iha serimónia enserramentu, Sua Exelénsia Ministru Nelyo Isaac Sarmento hatete katak atu aproveita eventu XII Jogos Desportivos CPLP ho máximu, Governu liuhusi MJDAK servisu hamutuk ho Ministériu Ensinu Superiór, Siénsia no Kultura (MESCC) hodi rekruta estudante voluntáriu sira ne'ebé ko'alia lian Portugés ho di'ak. Sira sei sai nu'udar Liaison Officer (LO) hodi apoia komisaun organizadóra no sai matadalan ba delegasaun sira hotu durante sira-nia estadia iha Timor-Leste.

"Ami rekruta joven sira atu apoia atividade ne'e, liu-liu estudante sira ne'ebé ko'alia lian Portugés di'ak atu ajuda komisaun organizadóra. Sira-ne'e sei sai Liaison Officer no fó apoiu ba kada delegasaun nu'udar matadalan durante sira-nia estadia iha Timor-Leste," dehan Sua Exelénsia Ministru.

Governante ne'e mós esplika katak durante loron tolu nia laran, voluntáriu sira aprende ona buat barak, hanesan: Oinsá halo asisténsia ba bainaka sira; Koñesimentu kona-ba protokolu báziku; Abilidade kona-ba hospitalidade atu atende bainaka sira.

Ministru mós salienta katak ida-ne'e oportunidade di'ak tebes ba joven sira, liuliu ba voluntáriu sira ne'ebé estuda iha área linguajen no turizmu, atu pratika lian Portugés no esplika ba país irmaun sira kona-ba fatin históriku no kulturál sira, inklui ai-han tradisionál Timor nian.

Nelyo Isaac klarifika katak liuhusi Jogos Desportivos CPLP ne'e, ne'ebé hanesan primeira vez akontese iha Timor-Leste, ema hotu-hotu, inklui Governu rasik, buka atu aprende. "Buat ne'ebé realiza bele sai lisaun atu iha futuru Timor-oan hatene ona atu organiza eventu sira hanesan ne'e," nia afirma.

Enkuantu, reprezentante voluntáriu husi Universidade Katólika Timor-Leste (UCT), Inessoi Virginia, hato'o agradesimentu ba oportunidade ne'ebé MJDAK no MESCC fó ba estudante sira atu partisipa formasaun ida-ne'e. Nia hateten katak sira aprende buat barak kona-ba oinsá servisu iha ekipa atu organiza eventu ida, oinsá halo asisténsia ba bainaka sira, inklui área hospitalidade. "Ami komprometidu ho esperansa boot atu garante atividade ne'e la'o ho susesu no sei hatudu ba nasaun membru CPLP katak Timor-Leste, maski nasaun ki'ik, bele organiza eventu internasionál," dehan Inessoi Virginia.

Partisipa iha atividade enserramentu ne'e mai husi Diretór Jerál Servisu Korporativu (DJSK), Isabel Adalziza Fatima Rodrigues Ferreira, Diretór Jerál Arte no Kultura (DGAC), Gil Paulino de Oliveira, hamutuk ho Direktór Nasionál no Xefe Departamentu sira inklui funsionáriu MJDAK ho Ekipa Komisaun Organizadóra ba Eventu XII Jogos CPLP 2025.

#MídiaMJDAK