Dili, 07 Janeiru 2025 – Sua Exelénsia Sekretáriu Estadu Arte no Kultura (SEAK), Jorge Soares Cristóvão, ne’ebé mós hala’o knaar nu’udar Koordenadór Jerál ba Jogu CPLP, prezide enkontru xave ida hodi avansa preparasaun ba eventu ne’ebé sei mai. Enkontru ne’ebé hala’o iha Salaun Magna MJDAK Lecidere iha Dili halibur Diretór Jerál Desportu (DJD), João M. Rodrigues, Diretór Jerál Juventude (DJJ), David Tomás de Deus, no mós diretór nasionál sira, Xefe Gabinete MJDAK, Egas Barros Guterres Godinho, no asesór tékniku sira.

Iha ninia diskursu, Sua Exelénsia SEAK subliña importánsia husi esforsu koordenadu ho di’ak iha preparasaun ba Jogu CPLP, ne’ebé tuir planu sei hala’o iha fulan Jullu ne’e. Enkontru ne’e ho objetivu atu finaliza esbosu kompriensivu ida kona-ba dokumentu hotu-hotu ne’ebé presiza, inklui planu orsamentu, hodi sai hanesan roteiru ba eventu ne’e. Ezbosu ne’e sei aprezenta durante diskusaun sira iha futuru ho liña ministeriál relevante sira ne’ebé responsavel ba organizasaun jogu sira.

“Ami-nia objetivu ohin maka atu asegura preparasaun kle’an ba Jogu CPLP. Ida-ne'e maka momentu orgullu ida ba ami, tanba ami antesipa atu simu partisipante sira to'o 706, la inklui delegasaun ministeriál sira. Ami-nia komisaun téknika serbisu maka’as hodi kria esbosu sólidu no planu orsamentu ne’ebé sei orienta ami hodi aprezenta proposta forte durante enkontru sira ne’ebé sei mai ho parte interesada ministeriál sira,” dehan Sua Exelénsia SEAK.

Liután nia husu ba Diretór Jerál sira, Diretór Nasionál sira, no Xefe Departamentu sira atu kolabora besik ho ekipa tékniku hodi asegura ezekusaun jogu sira ne’e ho susesu. Sua Exelénsia subliña katak ida-ne’e nu’udar oportunidade ba Timor-Leste atu hatudu nia abilidade atu sai uma-na’in ba eventu desportivu internasionál sira no atu eleva liután nasaun nia reputasaun iha palku globál.

Jogu CPLP tinan ida ne’e sei hetan partisipasaun másimu hosi Estadu-membru sira, ho delegasaun hanesan: Angola (partisipante 101), Brazil (101), Cabo Verde (101), Guiné-Bissau (61), Guiné Ekuatoriál (35), Mosambike ( 70), Portugál (101), São Tomé e Prínsipe (35), no Timor-Leste (101).

Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.

#MédiaMjdak