Díli, 6 Fevereiru 2025 – Comoro Child and Youth Center (CCYC) hala’o enkontru extraordináriu hodi aprezenta relatoriu mandatu 2020-2024 no hili lideransa foun ba períodu 2025-2029. Rezultadu votasaun fó maioria absoluta ba Zito Isodoro Freitas, ne’ebé kontinua lidera sentru juventude ne’e ba mandatu 2025-2029.

Atividade ne’e hala’o iha edifísiu CCYC, Díli, no loke husi Reprezentante Administradór Postu Dom Aleixo, José De Jesus. Partisipa iha enkontru ne’e mós Diretór Nasionál Asosiativizmu Juventude (DNAJ), Mário Tilman, ho ekipa Diresaun Nasionál Planeamentu no Koperasaun (DNPC), Ananias B. Da Silva Pinto, fundadora CCYC Jacinta dos Santos Guterres, no reprezentante sira seluk.

Iha okazuaun ne’e, Diretór DNAJ, Mário Tilman, subliña katak enkontru extraordináriu ne’e iha objetivu atu:

Aprezenta relatoriu kona-ba implementasaun programa no planu estratéjiku mandatu 2020-2024;

Hili membru Ezekutivu foun ba mandatu 2025-2029;

Re-dezenvolve planu estratéjiku CCYC ba tinan 2025-2029.

"Governu liu husi MJDAK kontinua elabora planu estratéjiku atu promove sentru juventude sira hodi fó asesu ba programa edukasaun siviku, saúdavel, kreativu no kompetetivu. Atu atinji mehi ida ne’e, presiza kria ambiénte ne’ebé fasilita dezenvolvimentu juventude Timor-Leste. MJDAK sei kontinua iha parseria ho organizasaun juventude, hanesan CCYC, hodi hala’o formasaun juventude ne’ebé forte no líder foun," hateten Mário Tilman.

Tilman mós akresenta katak, mudansa estrutura iha sentru juventude hotu-hotu sei kontinua, hodi enkoraja lideransa foun ba tempu oin mai.

Prezidenti Ezekutivu Eleitu, Zito Isodoro Freitas, subliña importânsia apoiu husi ema hotu atu garante sustentabilidade sentru ne’e. "Presiza atu iha unidade no responsabilidade hodi hetan objetivu CCYC. Ami sei kontinua dezenvolve sentru ida ne’e ho baze forte, ho suportasaun husi fundadora sira no partisipante hotu," dehan nia.

Partisipa iha enkontru ne’e mós observadór sira hanesan Xefi Departamentu DNAJ, João Barreto, Xefi Departamentu DNPC, Jacinto A. Ximenes, Xefi Seksaun Parlamentu Foinsa’e, Cesaltina Ferreira Da Silva Camacho, no reprezentante sira husi INDMO-IP, CNJTL, UNDP, KOICA, hamutuk ho funsionáriu sira husi DNAJ-MJDAK inklui kandidatu foun no partisipante seluk. 

#MédiaMjdak