Díli, 03 Fevereiru 2025 – Sua Excelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), hala’o reuniaun ho Federasaun Karate Timor-Leste (FEKATIL) atu finaliza planu implementasaun programa karate ba tinan 2025. Enkontru ne’e hala’o iha Salaun Magna MJDAK, Lecidere, Díli.

Iha reuniaun ne’e, Ministru NIS hamutuk ho ekipa MJDAK, inkluí Diretór Jerál Desportu João M. Rodrigues no Diretór Nasional Oscar Dias Quintas, diskute ho lideransa FEKATIL kona-ba kampionatu nasional ne’ebé sei hahú iha fulan Abril 2025. 

Ministru NIS subliña katak, eventu sira  la’ós de’it tenke hala’o iha Díli, maibé mos iha munisípiu sira hanesan Maliana no Lospalos, ne’ebé reprezenta zona. 

“Kampionatu ne’e labele fó ba senior sira de’it. Ita presiza inklui junior sira hodi prepara sira ba Jogu CPLP 2025 no Sea Games ne’ebé sei tuir mai,” dehan Ministru NIS.

Tuir planu FEKATIL, atleta sira sei partisipa iha eventu internasionál rua iha Vietnam no Filipina iha fulan Juñu no Jullu 2025. Kompetisaun sira ne’e sei inklui kategoria junior no senior, ho objetivu atu aumenta preparasaun atleta sira ba nivel internasionál.

Ministru NIS finaliza ho mensajen positivu, hateten katak koperasaun entre MJDAK no FEKATIL sei kontinua forte.

“Ho planu ne’e, ami espera katak karate iha Timor-Leste sei sai forte liu tan no bele reprezenta nasaun ho orgullu iha eventu internasionál,” dehan NIS.

#MédiaMjdak