DÍLI, 12 Juñu 2025 – Sua Exelénsia Ministru Juventude, Desportu, Arte no Kultura (MJDAK) no Prezidente Komisaun Organizadora XII Jogos Desportivas CPLP 2025, Nelyo Isaac Sarmento, akompaña husi Sua Exelénsia Sekretáriu Estadu Arte no Kultura (SEAK), Jorge Soares Cristovão, ohin asina Memorandu Entendimentu (MoU) ho Dili Development Company  (DDC) Timor Plaza. Serimónia asinatura ne'e hala'o iha salaun Magna MJDAK, Lecidere, Díli.

Iha konferénsia ba média ne'e, Prezidente Komisaun Organizadora, Nelyo Isaac Sarmento (NIS), hato'o agradesimentu ba DDC Timor Plaza, ne'ebé sai patrosinadór foun ba Jogos CPLP. "Ha'u agradese ba Timor Plaza ne'ebé ho vontade tomak atu hamutuk ho Governu hodi fó susesu ba Jogos CPLP ne'ebé sei hahú iha fulan balun tan," dehan Ministru Nelyo Isaac Sarmento.

Ministru mós salienta katak patrosíniu husi Timor Plaza ne'e fó mensajen forte ida ba Timor-oan hotu, liuliu ba instituisaun privadu sira, atu prepara án la'ós de'it hodi sai uma-na'in ba eventu internasionál sira, maibé mós nu'udar preparasaun ba Timor-Leste nia adezaun ba Asosiasaun Nasaun Sudeste Aziátiku (ASEAN). "Ita tenke prepara án atu sai uma-na'in ba eventu sira ne'ebé sei akontese iha ita-nia rain, hodi fó naran di'ak Timor nian ba mundu liuhusi diplomasia desportu nian. Loos duni, ita tenke hamutuk duni hodi lori naran Timor ba oin nafatin," nia subliña.

Iha fatin hanesan, Sr. Tony Jape, reprezentante husi Jape Kong Su Timor Plaza, hato'o agradesimentu ba Ministru tanba fó oportunidade atu hola parte iha eventu ida-ne'e. Nia rekoñese katak bainhira ekipa marketing husi Komisaun Organizadora XII Jogos CPLP nian husu patrosíniu husi Timor Plaza, nia simu kedas ho entuziazmu, “Sim, Parte Timor Plaza Prontu Atu Apoiu.” Sr. Tony Jape, ne'ebé gosta tebes desportu no akompaña nafatin eventu internasionál sira, hatete katak desportu presiza tebes apoiu husi patrosinadór sira.

Nia deside atu partisipa no kontribui ba eventu desportiva ne'e, liuliu ba material desportu nian, inklui kamizola no item sira seluk ligadu ho marketing. Timor Plaza mós iha otél ne'ebé adekuadu atu bele fasilita akomodasaun ba delegasaun sira husi CPLP ne'ebé mai Timor-Leste.

Asinatura MoU ne'e hetan partisipasaun masimu husi Xefe Gabinete MJDAK-SEAK, Asesór Komunikasaun no Relasaun Públika, no Asesora Konsultoria no Marketing.

#MídiaMjdak