DILI, 05 Junu 2025 – Ministériu Juventude, Desportu, Arte no Kultura (MJDAK), liuhusi Komisaun Nasionál Desportu (KND), ohin realiza Formasaun Anti-Doping Education & Learning (ADEL) ba ekipa nasionál futeból feto Sub-19 (U19) Timor-Leste nian. Formasaun ne'e, ho tema "Empowering Timor-Leste's Athletes to lead with integrity, Fairneess and Excellence," fasilita husi Kerry Gaillos, hala'o iha salaun Xanana Sport Center, Bairro Formosa, Díli.

Objetivu prinsipál husi formasaun ida-ne'e mak atu prepara atleta feto na'in 23 ne'ebé sei partisipa iha kompetisaun internasionál Asosiations Federations Futbol (AFF) Cup 2025 iha Vietnam, hodi garante sira-nia partisipasaun ho integridade, justu, no exelénsia.

Iha abertura, Sekretáriu Ezekutivu KND, Cesarino Da Silva, hateten katak formasaun ida-ne'e nu'udar rekezitu importante iha mundu desportu internasionál, liu-liu ba modalidade futeból no modalidade sira seluk. "Iha Timor-Leste ita hanoin hanesan baibain hela, iha rai seluk ne’e rigorozu tebes, ida maka anti dopajen," nia realsa. Nia mós esplika katak MJDAK, liuhusi KND, responsabiliza ba atividade anti-dopajen no fó formasaun ba atleta sira, treinadór, ofisiál, no parte interesada sira hotu ne'ebé servisu iha área ne'e.

Cesarino Da Silva hatutan katak edukasaun anti-dopajen iha oin rua: informasaun jerál husi KND no formasaun espesífika ne'ebé mai husi organizasaun internasionál liuhusi ADEL-WADA. "Atleta sira tenke komprende didi'ak matéria dopajen nian, tanba konsidera hanesan ona atleta internasionál iha ona obrigasaun atu hetan matéria ida-ne'e," nia dehan, no espera katak ekipa fasilitadór sira sei akompaña atleta sira to'o termina formasaun no hetan sertifikadu anti-dopajen.

Iha fatin hanesan, Adjuntu Sekretáriu Jerál FFTL, Fernando Xavier, hato'o agradesimentu ba KND tanba fó formasaun anti-dopajen ne'e ba ekipa futeból feto U19 ne'ebé sei aranka ba Vietnam. Nia apela ba atleta sira atu aproveita biban ida-ne'e tanba formasaun ne'e foun no importante tebes hodi tane a'as prinsipiu fair play ne'ebé FIFA no AFC komunga iha mundu desportu nian. "Husu ba atleta sira tenke fokus no konsentrasaun atu bele hetan konesimentu ruma husi matéria dopajen nian," nia apela.

Aleinde atleta sira, formasaun ne'e hetan partisipasaun mós husi treinadór, ekipa téknika husi FFTL, inklui staf husi KND.