Lisboa, 8 de Maiu de 2025 – Sekretáriu Estadu Arte no Kultura (SEAK), Sua Exelénsia Jorge Soares Cristovão, hala’o enkontru koordenativu importante iha Lisboa, Portugal, hodi diskute mekanizmu transferénsia subsídiu ba estudante Timor-oan sira ne’ebé kontinua estuda iha área Arte no Kultura iha Repúblika Popular Kuba.

Enkontru ne’e realiza hafoin remata partisipasaun iha Konferénsia Ministrus CPLP iha São Tomé, no sei fó dalan atu fasilita prosesu administrativu hodi transfere apoiu finanseiru ba estudante Timor-oan sira iha Kuba liuhusi konta bankária Embaixada Timor-Leste iha Portugal.

Enkontru importante ne’e envolve koordenasaun entre: Embaixadora Timor-Leste iha Portugal, Embaixador Timor-Leste iha Kuba, Embaixadora Timor-Leste ba Misaun CPLP no Delegasaun SEAK.

Diskusaun fó foku ba sustenta apoiu Governu nian ba estudante sira iha diáspora ne’ebé kontinua dezenvolve kapasidade akadémika iha área espesiál, hodi kontribui ba futura dezenvolvimentu kulturál no artístiku Timor-Leste nian.

“Koordenasaun ida-ne’e prova prioridade Governu nian atu garante kontinuidade no seguransa finanseiru ba estudante sira iha edukasaun superiór, liuliu iha área Arte no Kultura,” hateten SEAK Jorge Cristovão.

SEAK subliña tan katak solidariedade CPLP nian, liuliu relasaun diplomátika ho Kuba, fó oportunidade relevante ba juventude Timor-oan atu akumula esperiénsia internasionál, hanesan baze forte ba rekuperasaun no inovasaun kulturál iha tempu oin mai.

Governu Timor-Leste, liuhusi SEAK no Ministériu Juventude, Desportu, Arte no Kultura (MJDAK), sei kontinua halo esforsu atu monitoriza no fasilita sira-nia trajetu edukativu iha rai seluk, ho objetivu atu valoriza sira-nia kapasidade no kompromisu atu servisu ba povu no nasaun.

Enkontru ne’e parte husi ajenda diplomátika pós-Konferénsia CPLP nian, ho finalidade atu reforsa polítika públika edukativu no kulturál ida inkluzivu, ne’ebé tenke hetan monitorizasaun no asisténsia regulár husi instánsia governamentál kompetente.

#MídiaMJDAK