Díli, 24 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ofisialmente loke kalan kultural ida ne’ebé organiza husi estudante Dili Institute of Technology (DIT), iha resintu MJDAK. Kalan kultural ne’e mak parte husi inisiativa sira atu promove kreatividade, valorizasaun kultura, no patriotismu entre juventude timoroan.

Iha mensajen abertura nian, Ministru Nelyo Isaac (NIS) fó parabéns ba estudante DIT sira ho ninia inisiativa iha organizasaun kalan kultural ne’e. “Ita presiza juventude kreativu no pozitivu. Iha tempu ne'e, estudante sira investe tempu iha atividade kultural sira ne’ebé fó orgullu ba nasaun. Atu iha futuru di'ak, juventude presiza envolve-an ho buat ne’ebé kontribui ba dezenvolvimentu nasional,” hateten Nelyo Isaac.

Ministru Nelyo realsa mós importánsia sensibiliza juventude kona-ba kultura no identidade nasionál. “Amostra traje tradisionál ne’ebé estudante sira hatudu iha kalan kultural ne’e, prova katak juventude labele mo'e valor kultura. Traje nasional mak parte fundamental husi Timor-Leste nia identidade. Juventude tenke fó valor ba buat ne’e,” NIS subliña.

NIS kontinua hateten katak eventu hanesan kalan kultural ne’e bele sai plataforma atu aprende no hasae kapasidade jovem sira iha área planifikasaun, lideransa, koordenasaun no komunikasaun. “Husi prosesu organizasaun ne’e, imi aprende oinsa halo planu, buka apoiu, no halo ezekusaun tuir ideia ne’ebé mak imi kria. Ida ne’e labele halakon, tanba esperiénsia ne’e sei útil iha tempu mai, bainhira imi tama iha mundu profisionál,” Ministru Sarmento dehan.

Ministru mós fó obrigadu ba profesór sira no Instituisaun DIT tanba suporta estudante sira, no fó motivasaun atu espresa no deskobre talento. “Espasu hanesan kalan kultural ne’e importante atu fó voz ba jerasaun foun. Nasaun presiza juventude ne’ebé la deit husu, maibé pensa, kontribui no hala’o. Juventude hanesan motor dezenvolvimentu, iha hanoin kreativu no espírito lideransa,” nia hato’o.

Iha final, Ministru Nelyo Isaac motiva juventude sira atu kontinua halo buat di'ak, hanoin ba futuru, no hasae kualidade profisionál nian. “Ohin loron, Timor-Leste presiza ema matenek hanesan imi,” nia remata.

#MídiaMJDAK