Dili, 4 Fevereiru 2025 – Ministru Juventude, Desportu, Arte no Kultura (MJDAK), Sua Excelénsia Nelyo Isaac Sarmento, partisipa iha serimónia lansamentu programa “Futuru Líder ba ASEAN”, ho téma “Developing Timor-Leste’s Next Generation of Leaders for ASEAN”. Serimónia ne’e hala’o iha Salaun Nobre Ministériu Negósiu Estranjeiru no Kooperasaun (MNEK), Dili, Timor-Leste.

Serimónia ne’e halo atmosfera inspiradór, ho partisipasaun husi lideransa importante sira hanesan Sua Excelénsia Vise-Primeiru Ministru, Ministru Koordenador Assuntu Sosiál, Ministru Dezenvolvimentu Rural no Habitasaun Komunitária, Eng. Mariano Assanami Sabino; Sua Excelénsia Ministru Negósiu Estranjeiru no Kooperasaun, Bendito dos Santos Freitas; Sua Excelénsia Ministru Transporte no Komunikasaun, Miguel Marques Gonçalves Manetelu; Sua Excelénsia Vise-Ministra ba Assuntu ASEAN, Milena Rangel; no reprezentante husi Embaixada sira, Setor Privadu, Ajénsia Internasionál, Sosiedade Sivíl, no Akademia.

Iha diskursu nian, Sua Excelénsia Vise-Primeiru Ministru, Eng. Mariano Assanami Sabino, subliña importánsia programa ida ne’e ba dezenvolvimentu lideransa foun iha Timor-Leste. “Governu Konstituisionál da-9 investe ona ba jerasaun lideransa foun sira, ne’ebé sei sai hanesan motor ba dezenvolvimentu no partisipasaun aktivu iha ASEAN,” hateten Vise-Primeiru Ministru.

Assanami mós parabeniza graduadu sira husi programa primeiru no motiva partisipante foun sira atu aproveita oportunidade ida ne’e ho determinasaun. “FLBA la’ós deit kursu ida, maibé plataforma ida atu hari’i lideransa forte, fó oportunidade ba interkambiu ideia, no fortalese relasaun ho líder sira iha ASEAN. Ita boot sira sei sai embaxadór ba Timor-Leste iha rejiaun ne’e,” dehan Assanami.

Programa Futuru Líder ba ASEAN (FLBA) atrai interesse boot husi juventude, ho 500 aplikante, maibé apenas 110 mak hetan seleksaun rigoróza. Partisipante sira mak representa setór públiku, privadu, edukasaun, ONG, emprezáriu, no freelancers.

Programa ne’e fó oportunidade ba joven sira atu dezenvolve sira-nia kapasidade lideransa no hetan perspetiva ne’ebé lahanesan kona-ba kooperasaun rejionál ho nasaun ASEAN sira.

Sua Excelénsia Ministru Negósiu Estranjeiru no Kooperasaun, Bendito dos Santos Freitas, subliña katak programa ida ne’e sai hanesan preparasaun importante ba Timor-Leste nia integrasaun plena iha ASEAN.

“Programa ida ne’e reforsa ita-nia kapasidade ba lideransa, halo ita-nia juventude pronto atu enfrenta dezafiu rejionál no kontribui ba objetivu ASEAN nian,” hateten Ministru Freitas.

Sua Excelénsia Vise-Ministra ba Assuntu ASEAN, Milena Rangel, subliña katak programa ne’e mós fó oportunidade atu lideransa foun aprende liu husi semináriu, workshop, no partisipasaun iha enkontru ASEAN.

“FLBA sei habilita ita-nia joven sira atu sai vozes influente, ne’ebé sei defende interese Timor-Leste ho konfiansa no kompeténsia,” dehan Milena.

Iha serimónia ne’e, entrega mós sertifikadu ba partisipante 100 husi programa primeiru, ho emosaun no orgullu ba sira-nia esforsu. Paralelamente, hala’o mós lansamentu ba partisipante 110 ba programa segundu, ne’ebé sei sai protagonista ba lideransa foun Timor-Leste nian iha ASEAN.

#MédiaMjdak