DILI, 10 Maiu 2025 – S.E. Nelyo Isaac Sarmento, Ministru Juventude, Desportu, Arte no Kultura (MJDAK), ofisialmente halo abertura Kampeonatu Nasionál Loriku Taekwondo ba dahuluk ne’ebé hala’o ohin iha Salaun UNITAL, Becora, Dili.

Iha ninia diskursu, Ministru Nelyo Isaac Sarmento (NIS) agradese Akademia Taekwondo Loriku ne’ebé organiza ona eventu ida ne’e importante tebes ba dezenvolvimentu juventude nian. NIS hatete, "Esforsu atu prepara atleta joven sira-ne'e merese louva. Maski ita foin hahú, ha'u fiar katak ida-ne'e sei ajuda ita dezenvolve atleta sira ne'ebé loron ida bele reprezenta ita-nia nasaun iha nivel internasionál."

Ministru Nelyo mós subliña importánsia husi papél inan-aman nian hodi fó apoiu ba oan sira. "Imi nia oan sira hanesan rikusoin ida ne'ebé folin osanmean. Hodi apoia sira no fiar sira nia treinadór sira, imi kontribui ba susesu iha futuru ita nia nasaun nian", nia hatutan.

Aleinde ne’e, Ministru Nelyo fó hanoin ba partisipante joven sira atu haburas desportividade no reziliénsia mentál. "Manán ka lakon ohin la'ós buat hotu. Saida maka importante maka harii forsa mentál no atitude di'ak ida. Ita nia adversáriu sira la'ós inimigu, maibé belun sira ne'ebé ajuda ita dezenvolve iha desportu ne'e", NIS subliña.

Sra. Helmia Alkatiri, Prezidente Akademia Taekwondo Loriku, mós hato’o agradesimentu ba Ministériu nia apoiu, inklui subvensaun $500,000 ba eventu ne’e. “Kampionatu ida ne’e halibur família taekwondo iha Timor-Leste no fó oportunidade ba ita-nia oan sira atu dezenvolve sira-nia disiplina no preparasaun hodi reprezenta nasaun iha mundu internasionál,” dehan Sra. Helmia.

Kampeonatu ne’e hetan partisipasaun husi atleta 298, kompostu husi feto 156 no mane 142, ne’ebé mai husi munisípiu oin-oin. Sira kompete iha kategoria idade junior (moris 2011-2014) no kadete/pre-kadete (moris 2015-2017).

Eventu ida ne’e mos  marka prezensa importante lideransa nasaun Prezidente José Ramos-Horta,  Sra. Milena Pires, hamutuk ho patrosinadór lubuk ida ne’ebé fó apoiu ba desportu juvenil iha Timor-Leste.

#MídiaMJDAK