DILI, 03 Jullu 2025 – Ministériu Juventude, Desportu, Arte no Kultura (MJDAK), liuhosi Xefe Gabinete Egas Barros Guterres Godinho, akompañadu husi Diretora Jerál Servisu Korporativu (DJSK) Isabel Adalziza Fatima Rodrigues Ferreira, hamutuk ho Asesór sira, ohin simu ofisialmente ekipamentu lojístika husi kompañia Dili Development Company Timor Plaza. Serimónia entrega apoiu ne’e hala’o iha Salaun Sekretariadu ba XII Jogu CPLP, Sentru Konvensaun Díli (CCD), Timor-Leste.

Iha biban ne’e, Xefe Gabinete MJDAK, Egas Barros Guterres Godinho, ne’ebé reprezenta Sua Exelénsia Ministru, hato’o agradesimentu ba Dili Development Company Timor Plaza tanba kontribuisaun boot ba susesu Jogu CPLP nian.

“Hakarak informa ba ita boot sira ohin ita simu tan apoiu husi Timor Plaza. Husi akordu ne’e, ita realiza sira nia komitmentu hakarak sai mós na’in ba iha atividade jogu desportiva CPLP ne’ebé Timor-Leste mak sai uma na’in. Nune’e, ita agradese ba kompañia Dili Development Company Timor Plaza ne’ebé hakarak kontribui ba susesu atividade jogu CPLP,” dehan Xefe Gabinete.

Xefe Gabinete ne’e mós esplika katak ekipamentu sira ne’ebé entrega husi Dili Development Company Timor Plaza inklui: Bild Board Iha Kolmera, Publisidade: iha TV Timor Plaza Mall Live Streaming no Night Market kada Sabadu (gratuita ba promosaun Jogu CPLP), Promosaun: iha pájina Facebook Timor Plaza nian, Kamizola: 300 ba konferénsia Ministru sira nian, Diskontu ba: kuartu 25 iha Hotel Timor Plaza ba delegasaun ekipa teknika, Bandeira vertikál: atus ida (100) ne’ebé sei uza iha fatin importante sira ne’ebé realiza jogu no fatin entrada atu bainaka sira bele haree katak Timor-Leste hala’o jogu ne’e la’ós mesak, maibé ho apoiu husi patrosinadór Timoroan sira.

Apoiu husi Dili Development Company Timor Plaza ne’e hatudu parseira forte entre Governu no setór privadu iha Timor-Leste, hodi garante realizasaun Jogu CPLP ida ne’ebé susesu no marka istória.

#MídiaMJDAK