Xefe Gabinete MJDAK Loke Formasaun Siénsia Desportu hodi Mellora Dezempeñu Atleta Nasionál

DILI, 29 Maiu 2025 – Xefe Gabinete Ministériu Juventude, Desportu, Arte no Kultura (MJDAK), Egas Baros Guterres Godinho, ne'ebé reprezenta Sua Exelénsia Ministru Nelyo Isaac Sarmento (NIS), ohin halo abertura ba formasaun Siénsia Desportu. Atividade ne'e ho objetivu atu mellora dezempeñu Atleta Nasionál Timor-Leste, no hala'o iha Salaun Infordepe, Díli.

Iha serimónia abertura ne'e, Xefe Gabinete Egas Baros Guterres Godinho akompaña husi Diretór Jerál Desportu (DJD), João M. Rodrigues, hamutuk ho Prezidente Konfederasaun Desportu Timor-Leste (CDTL), Floriano Macario Sanches.

Tuir Prezidente CDTL, Floriano Macario Sanches, objetivu prinsipál husi formasaun ne'e mak atu aprende pontu importante tolu: vizaun estratéjiku ba dezenvolvimentu alta kompetisaun, sasukat atu sukat kapasidade dezempeñu atleta sira nian, no siénsia ba desportu. "Ohin hanesan faze inísiu ba ita-nia preparasaun antes desloka ita-nia atleta ba partisipa kompetisaun iha Tailándia 2025. Ho ida-ne'e ita hahú ona ho osan mean la'ós de'it ita-nia partisipasaun ida-ne'e mak tenke aplika siénsia," dehan Macario Sanches.

Iha nia intervensaun, Xefe Gabinete MJDAK Egas Baros Guterres Godinho, hodi naran Ministériu, husu ba atleta sira atu aproveita didi'ak oportunidade ne'e hodi aprende no hasa'e koñesimentu kona-ba téknika no estratejia desportu nian. Ida-ne'e atu bele hasa'e prestasaun hodi reprezenta Timor-Leste ba partisipa iha kompetisaun iha rai li'ur.

Reprezentante Ministru ne'e mós husu ba Federasaun sira atu identifika atleta ne'ebé iha poténsia hodi bele reprezenta Timor-Leste no hamorin naran nasaun nian iha mundu internasionál. Nia hateten katak Nonu Governu Konstitusionál mós iha polítika no hanoin ida kona-ba oinsá bele halakon "familiarizmu" atu nune'e bele hadi'a prestasaun servisu hodi buka atleta di'ak liu ba partisipa kompetisaun.

Partisipa iha formasaun ne'e mak Diretór Nasionál KND, Cesarino Da Silva, hamutuk ho Oradór sira, no mós Prezidente federasaun sira inklui atleta sira.

#MídiaMJDAK