Dili, 26 fevereiru 2025 – Komisaun Organizadora (KO) ba Jogu CPLP, ne’ebé lidera husi Sua Exelénsia Sekretáriu Estadu Arte no Kultura (SEAK), Jorge Soares Cristóvão, hamutuk ho Diretór Jerál Desportu (DJD), João M. Rodrigues, no Delegasaun Komisaun Tékniku Akompañamentu (CTA) CPLP, hala’o vizita ofisiál hodi avalia prontidaun infraestrutura xave desportu nian iha Dili. Inspesaun ne’e kobre ba Estádiu Munisipál Dili, Kampu Ténis iha UNTL, Kampu Futeból Praia Lecidere, no Kampu Futeból Akademia Becora.

Tuir SEAK, Jorge Soares Cristóvão, objetivu husi vizita CTA ne’e atu avalia progresu husi preparasaun uma-na’in ba Jogu CPLP, partikularmente kona-ba kondisaun instalasaun desportiva ne’ebé sei akomoda modalidade kompetisaun oioin.

"Ohin, ami nia Xefe Misaun, hamutuk ho Komisaun Tékniku Akompañamentu (CTA)

halo vizita ba fatin hirak ne’e hodi avalia diretamente ami nia prontidaun infraestrutura ba Jogu CPLP. Bazeia ba briefing tékniku sira, ami informa ba delegasaun katak obra reabilitasaun ba Estádiu Munisipál Dili sei hahú iha semana oin hodi garante fatin ne’e preparadu ba serimónia abertura," deklara S.E Jorge Soares Cristóvão.

Nu’udar Koordenadór Jerál ba Jogu CPLP, SEAK subliña liután katak Ministériu Juventude, Desportu, Arte, no Kultura (MJDAK) koordena besik ho Ministériu Planeamentu Infrastrutura no Ajénsia Dezenvolvimentu Nasionál (ADN) hodi tau matan ba hadi’a infraestrutura.

Delegasaun ne’e mós halo vizita ba fatin adisionál sira, inklui Jináziu Desportu Dili, Kampu Ténis, no fasilidade Voleibol Praia. Adisionalmente, Estádiu Akademia Becora sei entrega ofisialmente ba Governu Timor-Leste no sei inklui iha preparasaun ba Jogu CPLP. Hanesan parte ida hosi avaliasaun lojístika, ekipa ne’e mós halo inspesaun ba instalasaun akomodasaun sira, inklui Otél Hilton, Otél Ramelau, Otél Golgota, no Timor Plaza, hodi avalia sira-nia kapasidade hodi simu atleta no delegasaun sira.

Jogu CPLP 2025, ne’ebé marka ona ba fulan-Jullu, sei halibur joven atleta sira hosi nasaun luzófonu sira, hodi reforsa diplomasia desportiva no interkámbiu kulturál iha komunidade nia laran.

#MediaMJDAK