Díli, 2 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), prezide reuniaun téknika krusiál ida ho reprezentante federasaun desportiva nasionál sira ne’ebé sei partisipa iha eventu prestijiozu Jogos da Comunidade dos Países de Língua Portuguesa (CPLP) 2025. Reuniaun importante ne’e hala’o iha Salaun Magna, Lecidere, Dili.

Enkontru ne’e nu’udar parte integrante husi preparativu ofisiál Timor-Leste nian ba partisipasaun iha Jogos CPLP tinan ne'e. Partisipa iha reuniaun ne’e Diretór Jerál Desportu, João M. Rodrigues, Xefe Gabinete, Egas Barros Guteres Godinho, Diretór Nasionál sira, asesór tékniku sira, no Prezidente federasaun desportiva sira.

Durante intervista, Ministru Nelyo Isaac Sarmento enfatiza katak finalidade prinsipál husi reuniaun ne’e mak atu avalia preparasaun federasaun sira-nian, liuliu kona-ba konsentrasaun atleta sira iha sentru treinamentu. Ministru informa katak federasaun sira sei hahú preparasaun intensivu iha loron 10 fulan Maiu tinan 2025 iha training center (TC) ne’ebé designa ona. NIS subliña importánsia atu fornese informasaun detalladu no prepara atleta sira ho rigor, tanba prosesu akizisaun ekipamentu no materiál desportivu nian sei kontinua la’o hela.

Ministru Nelyo mós informa katak totál atleta ne’ebé sei reprezenta Timor-Leste iha Jogos CPLP 2025 hamutuk na’in 101, husi modalidade desportiva 9. Nia akresenta katak númeru ne’e bele aumenta tan karik iha atleta ruma ne’ebé presiza subtituisaun.

Atleta sira sei simu apoiu tomak durante sira-nia hela iha sentru treinamentu, inklui monitorizasaun médika regulár, dieta nutrisaun ho proteína adekuadu, no treinamentu intensivu hodi asegura sira iha kondisaun fízika óptima atu kompete.

Modalidade desportiva 9 ne’ebé Timor-Leste sei partisipa iha Jogos CPLP 2025 mak: Taekwondo, Karate-do, Futeból, Basketból, Vólei Praia, Xadrez, Ténis de Meja, Atletizmu no Lançamento de Peso

#MediaMJDAK