Dili, 27/01/2025 – Pasu signifikativu ida hodi hametin lasu kulturál entre Timor-Leste no Austrália marka ho hasoru malu entre Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), no Sua Exelénsia Sekretáriu Estadu Arte no Kultura (SEAK), Jorge Soares Cristovão, ho proeminente australianu Ministru Asuntu Internu Austrália nian Exelénsia Anthony Stephen Tony Burke, ne'ebé mós tau matan ba Imigrasaun no Relasaun Multikulturál sira, Seguransa Sibernétika, no Arte Austrália nian.

Akompaña husi Embaixadór Austrália iha Timor-Leste, delegasaun ne’e hala’o vizita ba Espozisaun Arte Indíjena Austrália no espozisaun sira seluk iha Edifísiu Fundasaun Oriente iha Bidau Licidere, Dili.

Vizita ne’e fó oportunidade ba diskusaun signifikativu entre Sua Exelénsia Tony Burke no líder Timor-Leste sira, hodi foka ba kolaborasaun artístika ne’ebé riku no la’o hela entre nasaun rua ne’e. Diálogu ne'e subliña importánsia atu haburas interkámbiu kulturál, promove komprensaun mútua, no hametin lasu sira liuhosi apresiasaun fahe ba arte sira. 

Eventu ne’e destaka parseria kulturál ne’ebé buras daudaun entre Timor-Leste no Austrália, hodi loke dalan ba inisiativa arte no kulturál sira iha futuru.

#MediaMJDAK