Díli, 6 Fevereiru 2025 – Sua Excelência Ministru Juventude, Desportu, Arte no Kultura (MJDAK), Nelyo Isaac Sarmento (NIS), lidera reuniaun ho parseiru permanente Special Olympics Timor-Leste (SOTL), fó atensaun ba preparasaun Regional Games ne’ebé sei realiza iha fulan Agostu 2025 iha Munisípiu Manatuto.

Iha okaziaun ne’e, Ministru Nelyo Isaac Sarmento reitera importância ba atividadese SOTL nian, destacando susesu eventu Regional Games SOTL nian iha Munisípiu Ermera iha tinan kotuk. Sua Excelência hateten katak Governu sei kontinua fó apoiu ba dezenvolvimentu desportu inkluzivu, haktuir esforsu atu promove partisipasaun igualitária, inkluí jogadór mane no feto iha modalidade diversa hanesan futebol, atletismu no boxe.

Vice-Prezidente SOTL, Januário Gomes, hateten katak Regional Games ba tinan 2025 sei fó prioridade ba modalidade tolu: atletismu, boxe no futebol 5.

Tuir planu, delegasaun Timor-Leste sei partisipa mós iha Jogos Internasionál do Pacífico ne’ebé sei realiza iha Bandung, Indonézia, iha fulan Novembru 2025, ho modalidade futebol 5 nian.

Reuniaun ne’e foka ba asuntu tekniku no preparasaun organizativa, liu-liu koordenasaun kona-ba partisipasaun munisípiu sira. Planifikasaun inklui Munisípiu Manatuto, Baucau, Viqueque no Lautém, ne’ebé sei kontribui ba eventu ne’e hodi promove dezafiu saudável no integrasaun ba atleta sira ho espesífiku.

Sorumutu ne’e mos partisipa Diretur Jerál Desportu, Diretur Desportu Federadu, Asesor Tékniku ba Komunikasaun no Relasaun Publika, Xefi Departamentu Alta Kompetisaun, no staf Diresaun Desportu nian.

#MédiaMjdak