DILI, 11 Jullu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, halo entrevista eskluziva ida iha programa "Governu Responde" iha Rádiu Metro FM. Iha entrevista ne'e, Ministru Nelyo Isaac Sarmento fó vizaun klean kona-ba importánsia XII Jogu CPLP 2025 nian ba Timor-Leste. Atividade ne’e hala’o iha estudu Rádiu Metro FM, rua Bispo de Medeiros, Kintal Boot, Díli.

Ministru Nelyo Isaac Sarmento (NIS) hateten katak sai nu’udar membru CPLP, ne’ebé adota lian ofisiál portugés, sai hanesan priviléjiu ida ba Timor-Leste. "Ida ne’e hanesan priviléjiu ida ba Timor, tanba ita hanesan país membru CPLP ne'ebé adota lian portugés iha ita nia istória, no ita sai hanesan país úniku ida ne'ebé ko’alia lian portugés mesak hela iha Ázia. Ita sente katak hamutuk ho país membru sira, ita la sente mesak; sira hamutuk ho ita atu haburas kultura no identidade," dehan Nelyo Isaac.

Jogu CPLP: Porta Fini ba Promosaun Nasionál

Ministru ne’e esplika katak partisipasaun iha CPLP loke oportunidade barak ba Timor-Leste atu hatudu ninia kapasidade nu’udar Estadu membru. "Wainhira ita tama ona iha organizasaun ne’e, iha servisu barak mak atu oferese hanesan Estadu membru. Liuhusi kapasidade ne’ebé ita iha, atividade ida mak desportu ne’e rasik," Ministru realsa.

Nia salienta katak Jogu CPLP la’ós de’it atu hatudu Timor-Leste nia kbiit iha modalidade desportu, maibé atu promove potensialidade Timor-Leste nian ba mundu. "Ita uza oportunidade ba Jogu CPLP ne’e la’ós atu hatudu katak Timor maka’as iha modalidade desportu sira hotu, maibé atu hatudu ba mundu katak ida ne’e mak Timor. No Timor-Leste hakarak lori sira mai la’ós de’it atu partisipa jogu, maibé lori CPLP atu loke oituan atensaun país sira iha Ázia no Europa bele hatene Timor ne’e mak ida ne’e. Potensialidade iha área ekonómiku, área turizmu, kultura, sira bele mai hodi haree no bele dezenvolve di’ak liután," esplika Ministru.

Liu husi eventu ne’e, desportu sei sai hanesan poténsia ida atu atrai ema no hametin partisipasaun Timor-Leste nian iha CPLP. "Ho ida ne’e bele hatene ona katak Timor-Leste la’ós ona país ida abitua ho konflitu, maibé país ida trankilu, ho dame no paz," afirma Nelyo Isaac.

Preparasaun Jogu no Kalendáriu Atividade

Kona-ba preparasaun ba jogu, Ministru Nelyo Isaac informa katak 98% preparadu ona. Delegasaun husi país membru sira hotu konfirma ona sira nia partisipasaun, ho de’it país rua mak sei la mai: Brazíl no Giné Ekuatoriál.

Tuir kalendáriu ne’ebé estabelese ona: 17 Jullu: Delegasaun sira sei to’o iha Timor-Leste ; 18 Jullu: Sei hala’o Technical Meeting; 19 Jullu: Serimónia abertura jogu sei hahú iha tuku 16:00, ne’ebé sei kontinua ho jogu futeból entre Timor-Leste no Portugál.

Ministru mós esplika katak iha eventu boot ida ne’e, la’ós de’it iha jogu desportivu, maibé mós sei iha Fórum Juventude CPLP no Konferénsia Ministériu Juventude país membru CPLP nian. Iha momentu ne’e, Angola mak sai nu’udar Prezidensia CPLP, maibé Nelyo Isaac Sarmento sei simu mandatu Prezidensia ba tinan rua no sei entrega fali ba Ministru Brazíl nian iha tinan 2027.

Timor-Leste nu’udar uma na’in ba Jogu CPLP ne’e sei promove potensiál rai nian ba Europa, Ázia no Amérika Latína, hodi konvida país sira ne’e atu rekoñese Timor-Leste nu’udar país ida ne’ebé iha potensialidade oioin atu dezenvolve hamutuk iha setór kultura no sosiál-ekonómika.

País sira ne’ebé ko’alia lian portugés no inklui iha Komunidade CPLP mak hanesan Portugál, Mosambike, Kabu Verde, Brazíl, Giné-Bisau, Giné Ekuatoriál, Saun Tomé no Prínsipe, Angola, no Timor-Leste.

#MediaMjdak