Díli, 22 Maiu 2025 – Ministériu da Juventude, Desportu, Arte no Kultura (MJDAK), liuhosi Centro Juventude Comoro (CCYC), realiza semináriu ho téma “Importánsia Atividade Desportiva ba Ita-nia Saúde” iha Eskritóriu Suku Bemori, Postu Administrativu Nain Feto, Munisípiu Díli.

Abertura ofisiál semináriu ne’e representa husi Xefe Gabinete MJDAK, Sr. Egas Barros Guterres Godinho, ho akompanhamentu husi Diretór Nasionál ba Desportu ba Ema Hotu (DNDPT), Sr. Egas Freitas de Rosa.

Iha nia diskursu, Xefe Gabinete subliña katak Governu Konstitusionál Daneen, liuhosi MJDAK, kontinua fó prioridade ba promosaun desportu iha komunidade, liu-liu ba foin-sa’e sira.

“MJDAK hato’o parabéns ba komisaun organizadora tanba kontribui atu fo koñesimentu kona-ba benefísiu atividade desportiva ba saúde. Saúde mak iha ita-nia liman rasik,” hatete Xefe Gabinete.

Nia hatutan, MJDAK sei kontinua fó apoiu ba programa desportivu sira ho finalidáde atu hadi’a no hasa’e konsiensia juventude kona-ba desportu no estilo moris saudável.

Administradór Postu Nain Feto, Sr. Lois Casimiro Lopes, hato’o agradesimentu ba MJDAK no CCYC tanba dezenvolve iniciativa edukativu ne’e iha suku. Nia apela ba juventude iha Suku Bemori atu partisipa ativamente iha atividade sira atu bele dezenvolve komportamentu saudávil iha sira-nia komunidade.

Atividade ida-ne’e envolvê partisipasaun juventude na’in 38 husi aldeia hitu iha suku, inklui Xefe Suku, Xefe Aldeia, pesoál suku nian, no ekipamentu CCYC nudar komisaun organizadora.

#MídiaMJDAK