DÍLI, 21 Juñu 2025 – Sua Exelénsia Vise Primeiru Ministru II, Mariano Assanami Sabino, hamutuk ho Sekretáriu Estadu Arte no Kultura (SEAK), Jorge Soares Cristovão, no funsionáriu sira husi Ministériu Juventude, Desportu, Arte no Kultura (MJDAK), ohin selebra Loron Internasionál Yoga ba Dala XI. Selebrasaun ne'e hala'o iha Top Golft, Área Branca, Cristo Rei, Díli, Timor-Leste, ho tema inspirativu ba tinan ne'e, “YOGA ba Rai Ida no ba Saúde Ida”.

Iha diskursu ida ne'ebé motivadór, Vise Primeiru Ministru II, Mariano Assanami Sabino, hato'o agradesimentu no rekoñesimentu boot ba Sua Exelénsia Embaixadór Repúblika Índia ba Timor-Leste, Kumar, no nia ekipa diplomátika, inklui embaixada sira seluk no ajénsia internasionál, liuliu ba staf organizadór sira ne'ebé konvida Governu atu partisipa iha serimónia importante ida-ne'e.

Vise Primeiru Ministru mós hato'o agradesimentu ba Primeiru Ministru Índia, Narendra Modi, ne'ebé hato'o nia karta ba Sua Exelénsia Primeiru Ministru Kay Rala Xanana Gusmão, hodi realsa importánsia Loron Internasionál Yoga nian. "Mensajen ida-ne'e hatudu katak Yoga maka prezente universál ida, nu'udar instrumentu unidade, saúde, dame no solidariedade iha mundu," dehan Vise Primeiru Ministru.

Nia salienta katak Yoga la'ós ezersísiu físiku de'it, maibé hanesan prátika ida ne'ebé haburas isin no neon hakmatek no hasa'e espiritu. "Yoga mós haburas disiplina pesoál no harmonia interna ba ita iha Timor-Leste, liuliu iha área rurais ne'ebé infraestrutura saúde modernu sei limitadu, tanba konsekuénsia ritmu dezenvolvimentu nian," nia afirma. Vise Primeiru Ministru mós hatutan katak Yoga nu'udar meiu ida ne'ebé asesivel, preventivu no holístiku ba bem-estar físiku no mentál ema nian. Aleinde benefísiu ba saúde, Yoga mós iha signifikadu sosiál boot, sai ponte ida entre komunidade sira no hatudu dalan ba moris ho solidariedade, konsisténsia no harmonia.

Selebrasaun ohin nian mós reflete lasu diplomátiku no kulturál ne'ebé buras entre Timor-Leste no Índia. Vise Primeiru Ministru II halo ligasaun ba vizita Estadu husi Prezidente Repúblika Índia, Rohpaerdi Murni, iha loron 10-11 Agostu 2024, ne'ebé asina Memorandu Entendimentu (MoU) interkambiu kulturál entre nasaun rua, ne'ebé hametin kooperasaun iha área arte, patrimóniu no diálogu kulturál. Nia mós subliña katak iha espíritu diálogu no kooperasaun kulturál ida-ne'e, Konferénsia Komunidade Aziátika ba Dala IV sei hala'o iha Díli, iha loron 26 to'o 29 Juñu 2025, ne'ebé sei partisipa husi membru Aziátiku sira hotu, País Luzófonu sira, no Estadu Índia Goa.

Nu'udar Vise Primeiru Ministru II ba Asuntu Sosiál, nia apela ba Timor-oan hotu, liuliu katuas, ferik, joven no labarik sira iha sentru urbanizasaun no rurais, atu adota Yoga nu'udar parte ida husi moris loroloron nian. "Yoga la nesesita gastu boot, presiza tebes de'it konsiénsia pesoál no Yoga bele ajuda ba ita ida-idak sai saudavel ho koletivamente ba sosiedade ida ne'ebé reziliente liu. Mai ita dada iis kle'an, hamamar án no konsiénsia la'o hamutuk iha armonia ba mundu ida de'it, ba saúde ida de'it, no família umanu ida de'it," nia konklui.

Iha fatin hanesan, Sua Exelénsia Embaixadór Índia ba Timor-Leste, Kumar, hato'o agradesimentu ba partisipante sira hotu ne'ebé marka prezensa hodi selebra Loron Internasionál Yoga ba Dala XI, ne'ebé organiza husi Embaixada Índia hamutuk ho MJDAK. Nia hateten katak Yoga, ne'ebé mai husi Índia, hanesan prátika ida ne'ebé dezenvolve ona durante tempu naruk ba umanidade atu sai saudavel no kontente. Embaixadór mós realsa katak Nasoins Unidas aprova rezolusaun ida iha fulan Dezembru 2014, ne'ebé nomeia loron 21 Juñu nu'udar Loron Internasionál Yoga. Nia mós agradese ba Vise Primeiru Ministru Mariano Assanami Sabino ba nia prezensa nu'udar fonte enkorajamentu ba hotu-hotu, no agradese mós ba Sekretáriu Estadu Arte no Kultura, Jorge Soares Cristovão, ne'ebé rekoñese atleta na'in 85 ne'ebé ohin partisipa no espera sira susesu iha XII Jogos Desportivos CPLP 2025 nian.

Loron Internasionál Yoga ba Dala XI ne'e partisipa husi entidade sira hanesan korpu diplomátiku ne'ebé rezidensiál iha Timor-Leste, funsionáriu sira husi MJDAK-SEAK, Embaixada Índia, no atleta sira ne'ebé atu kompete iha XII Jogos Desportivos CPLP 2025 nian.

#MídiaMJDAK