Dili, 15 Janeiru 2025 – Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha sorumutu estraordináriu Konsellu Ministrus iha Palásiu Governu, ne’ebé prezidi husi Primeiru-Ministru Kay Rala Xanana Gusmão. Iha sorumutu ida-ne’e, Konsellu Ministrus aprova Projetu Dekretu-Lei kona-ba Orgánika Sekretaria Estadu Komunikasaun Sosiál (SEKOMS), ne’ebé aprezenta husi Sekretáriu Estadu Komunikasaun Sosiál, Expedito Dias Ximenes.

Dekretu-Lei ida-ne’e ajusta estrutura orgániku-funsionál SEKOMS hodi suporta atribusaun no implementasaun efikás programa sira tuir Planu Estratéjiku 2024-2028 no Programa Governu Konstitusionál IX. SEKOMS tenke realiza polítika komunikasaun sosiál, disemina informasaun kona-ba asaun Governu nian, no elabora regulamentu relevante atu sustenta desenvolvimentu área ne’e.

Ministru Administrasaun Estatál, Tomás do Rosário Cabral, aprezenta Projetu Rezolusaun Governu kona-ba ezekusaun Estratéjia Desentralizasaun Administrativa no Instalasaun órgaun reprezentativu podér lokál tinan 2025-2028. Rezolusaun ne’e hetan aprovasaun no pretende reforsa procesu desentralizasaun no konsolida autoridade munisípiu.

Planu anuál 2025-2028 sei abrange instalasaun servisu Balkaun Úniku, regulamentu lei sira kona-ba podér lokál, no atualizasaun baze-dadus resenseamentu eleitorál. Etapa futura sei inklui eleisaun munisipál no kapasitasaun ba prezidente munisipál eleitu sira. Relatóriu progresu sei aprezenta semestralmente atu avalia efektividade no kontinuidade estratéjia ne’e.

Rezolusaun ne’e revoga Rezolusaun Governu n. 45/2020 no sei vigora hafoin nia publikasaun.

#MédiaMjdak