Díli, 8 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho membru IX Governu Konstitusionál, partisipa iha sesaun solene espesiál ne’ebé hala’o iha Parlamentu Nasionál hodi simu vizita ofisiál husi Prezidente Senadu Reino Kambodia, Samdech Akka Moha Sena Padei Techo Hun Sen.

Prezidente Senadu Kambodia, iha ninia diskursu ho títulu inspiradór “Lisaun sira hosi Hun Sen: Husi Jenosídiu no Pobreza ba Liberdade no Prosperidade”, partilla mensajen profunda kona-ba ninia esperiénsia lideransa durante periodu difísil iha konflitu no iha prosesu dezenvolvimentu. Nia  liafuan sira fó motivasaun ba Timor-Leste atu kontinua hametin paz, demokrasia, no estabilidade.

Vizita ofisiál husi Prezidente Senadu Kambodia mai Timor-Leste subliña kompromisu forte Reino Kambodia nian ba fortalesimentu relasaun diplomátiku no parlamentár entre nasaun rua. Pasu signifikativu ida ne’e mós kontribui ba hametin no dinamiza lasu bilaterál, no avansa liu tan paz, seguransa, estabilidade, no prosperidade iha rejiaun no iha nivel global.

Prezidente Parlamentu Nasionál Timor-Leste, Sua Exelénsia Maria Fernanda Lay, hato’o boas-vindas calorosas ba Prezidente Hun Sen no delegasaun Kambodia nian iha nia diskursu. Nia mós destaka katak vizita importante ida ne’e fó sinál motivadór ba Timor-Leste iha ninia preparasaun atu atinje estatutu membru plenu iha Asosiasaun Nasoins Sudeste Aziátiku (ASEAN) iha tinan ida ne’e.

#MídiaMJDAK