DÍLI, 13 Juñu 2025 – Ministériu Juventude, Desportu, Arte no Kultura (MJDAK), liuhusi Diresaun Jerál Juventude no Diresaun Nasionál Dezenvolvimentu Juventude, ohin anúnsia lansa aplikasaun ba partisipasaun iha Programa SSEAYP (Ship for Southeast Asian and Japanese Youth Program). Programa ne'e, ne'ebé sei hala'o iha ró Nippon Maru, ho objetivu atu promove amizade no kria kompreensaun mútua entre foin-sa'e sira husi Japaun no nasaun 10 husi Sudeste Aziátiku. 

Bazeia ba rekezitus SSEAYP nian ba tinan ne'e, MJDAK sei rekruta foin-sa'e Timoroan na'in neen (6), kompostu husi feto tolu (3) no mane tolu (3), atu reprezenta Timor-Leste nu'udar Observer Participation iha programa refere. Programa ne'e sei hala'o iha nasaun tolu, hanesan Japaun, Singapura, no Tailándia, ho durasaun tempu fulan ida. 

Oráriu Provizóriu Programa SSEAYP (The 49th SSEAYP):

• 15 Janeiru 2026: To'o iha Tókiu ba Lider Nasionál (NLs) no Partisipante Juventude (PYs). 
• 16 – 24 Janeiru 2026: Programa iha Japaun, inklui orientasaun, serimónia inagurasaun, vizita kortezia ba Primeiru Ministru (TBC), programa lokál (homestay, interasaun ho foin-sa'e lokál), no programa Tókiu (estudu kampu, aprezentasaun nasionál). 
• 25 Janeiru – 3 Fevereiru 2026: Programa iha Ró I, inklui diskusaun, aprezentasaun nasionál, no atividade sira seluk. 
• 4 – 8 Fevereiru 2026: Programa iha Singapura, inklui vizita kortezia, homestay, no interasaun ho foin-sa'e lokál. 
• 9 – 10 Fevereiru 2026: Programa iha Ró II, inklui diskusaun, aprezentasaun nasionál, atividade, no sesaun pós-programa. 
• 11 – 16 Fevereiru 2026: Programa iha Tailándia, inklui vizita kortezia, homestay, interasaun ho foin-sa'e lokál, konferénsia Governu, aprezentasaun rezultadu diskusaun, fórum sumáriu, serimónia enserramentu, no festa despedida. 
• 17 Fevereiru 2026: Partida. 

Prosesu Simu Kandidatus:

1. Faze Hahú: Submete dokumentus, selesaun dokumentus, no publika naran aplikante ne'ebé liu ona selesaun.
2. Faze Teste: Teste eskrita no publika rezultadu teste eskrita.
3. Faze Finál: Entrevista no publika rezultadu finál.

Kritériu no Dokumentus ba Aplikantes:

• Kritériu:
• Foin-sa'e sidadaun Timoroan. 
• Idade entre 18 no 30 tinan. 
• Iha koñesimentu di'ak kona-ba lian Inglés: hakerek, rona no ko'alia (tenke justifika ho sertifikadu kursu). 
• Kondisaun saúde no mentál ne'ebé di'ak (atuál). 
• Edukasaun mínimu sekundária. 
• Hela fatin iha Timor-Leste. 
• Foin-sa'e sira mai husi organizasaun juveníl, emprezarial juveníl, no universitáriu. 
• Iha abilidade komunikasaun di'ak. 
• Iha koñesimentu di'ak kona-ba istória no kultura Timor-Leste nian. 
• Iha abilidade ba área múzika, teatru no arte. 
• Dokumentus:
• Karta deklarasaun husi organizasaun/instituisaun ne'ebé hakna'ar an ba (karik liu selesaun, atu hetan autorizasaun hodi ba tuir atividade SSEAYP iha fulan Janeiru-Fevereiru 2026). 
• Curriculum Vitae (CV) ho asinatura husi sasin na'in 2. 
• Foto koloridu ho medida (3x4) tahan 2. 
• Fotokópia Diploma eskola ho sertifikadu lian Inglés. 
• Atestadu Mediku Atual. 

Maneira atu Aplika:

• Dokumentu sira bele submete direta iha edifísiu MJDAK, Diresaun Nasionál Dezenvolvimentu Juventude, Lecidere, Díli. 
• Oras: 08:30-17:00 OTL. 
• Dokumentus sei rai iha map Azul ba mane no map Kinur ba feto. 
• Aplikasaun mós bele via Email: mjdakdndj@gmail.com ka Whatsapp (WA): 77512146/74195406. 

Data Submete Dokumentus hahú husi 16 to'o 30 Juñu 2025.

Prezidente Júri ba prosesu selesaun ne'e maka Firminio Dias Quintas Soares.