Dili, 22 Abril 2025 — Membru Parlamentu Foinsa’e Nian (PFN) total 138, hosi 12 Munisípiu inklui RAEOA no Ema ho Difisiénsia (EhD), partisipa formasaun iha Akadémia Polísia, Comoro – Dili. Atividade ne’e organiza husi Alumni Parlamentu Foinsa’e Timor-Leste (APFTL) ne’ebé finansia husi guvernu liu husi Ministériu Juventude, Desportu, Arte no Kultura (MJDAK).

Formasaun ne’e fó oportunidade ba membru PFN sira atu hetan koñesimentu kona-ba Planeamentu Dezemvolvimentu no Orsamentu, sistema eleitoral, Life Skill Basic Education (LSBE), Edukasaun Sivika no Análiza Sosiál (Ansos).

Sua Exelénsia Ministru MJDAK, Nélyo Isaac Sarmento (NIS), hatete katak Timor-Leste mak nasaun ne’ebé harii husi sofrimentu no limitasaun. Tanba ne’e, “Ita presiza vontade, voluntarizmu no pensamentu di’ak atu kontinua lori nasaun ba direisaun ne’ebé di’ak. Ita mai husi jerasaun frajil, maibé iha poder atu muda mentalidade ba futuru.”

Ministru mós fó enfaze ba impaktu negativu hosi media sosiál, no husu ba juventude sira atu fó prioridade ba edukasaun no kontribui atu fó moris di’ak ba komunidade.

Formandu Rainha Viegas Pinto, hosi Postu Cristu Rei, Munisípiu Dili, hanoin katak formasaun ne’e importante tebes. “Formasaun ida ne’e la’os de’it ba ami, maibé bele partilla fali ba komunidade, ba suku sira ne’ebé presiza tulun.”

Formasaun ne’e hetan kontribuisaun husi formadór sira hosi Alumni Parlamentu Foinsa’e no tekniku MJDAK. Partisipantes mai hosi munisípiu sira tomak, inklui RAEOA ne’ebé involve mos EhD, hanesan parte estratéjika ba fortalese lideransa no partisipasaun sosiál iha nivel lokal no nasional.

#MediaMJDAK