DILI, 21 Fevereiru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin loke sesaun diskusaun ida ho ekipa Sport Medicine Timor-Leste. Diskusaun ne'e foka ba preparasaun Jogos CPLP 2025 nian ne'ebé sei realiza iha Timor-Leste. Enkontru ne'e hala'o iha Salaun Magna MJDAK, Lecidere, Díli.

Iha nia diskursu abertura, Ministru Nelyo Isaac Sarmento husu apoiu husi Ministériu Saúde (MS) atu fó suporta ba atleta sira ne'ebé iha prestasaun di'ak, liuliu ba federasaun sira. Nia hateten katak integrasaun entre federasaun sira ho governu importante tebes hodi asegura rutina ba atleta sira ne'ebé konsidera hanesan atleta nasionál.

"Tanba ne'e mak ba maluk sira hotu, liuliu ba reprezentante federasaun sira tenke iha obrigasaun atu kontribui ba esforsu ida-ne'ebé governu introdús ba federasaun sira hotu atu intende kona-ba ida-ne'e," Ministru Nelyo Isaac subliña. Nia mós realsa importánsia ba atleta sira atu iha koñesimentu di'ak liu tan kona-ba oinsá atu hetan stamina ne'ebé di'ak hodi bele kompete iha modalidade hanesan Boxe, Atletizmu, Vólei-bol, no Taekwondo, ho apoiu husi médiku sira.

"Ita hakarak atleta ne'ebé reprezenta estadu ne'e, ita hotu sai ida de'it, ligasaun ida de'it, ba Timor-Leste, tanba nasionalizmu pertense ba estadu ida ne'e importante tebes," nia afirma.

Iha sorin seluk, Diretór Jerál Desportu (DJD), João Rodrigues, hateten katak durante preparasaun no partisipasaun iha rai li'ur, Timor-Leste kuaze seidauk iha akompañamentu husi parte Sport Medicine nian. Tanba ne'e, oportunidade ida-ne'e uza atu introdús ona akompañamentu husi Sport Medicine ba dezenvolvimentu desportu iha Timor-Leste. Nia informa katak iha ona ekipa mai husi HNGV ne'ebé halo aprezentasaun kona-ba preparasaun atleta, akompañamentu nutrisaun, no envolvimentu fiziólojia nian. Objetivu prinsipál husi reuniaun ida-ne'e, hamutuk ho federasaun sira, mak atu hahú introdús akompañamentu Sport Medicine ba Jogos CPLP no mós ba eventu internasionál sira tuir mai hanesan Sea Games iha Tailándia.

Dr. Cornelios Coli, Médiku Desportu husi HNGV, mós aprezenta parte Ministériu Saúde nian ne'ebé foka ba asuntu importante rua: atendimentu ba eventu nu'udar rekizitu ida ne'ebé tenke prienxe, no operasionál ba atleta sira atu nune'e bele forma atleta di'ak ne'ebé bele reprezenta Timor-Leste iha eventu internasionál, liuliu ba Jogos CPLP ne'ebé sei mai. Nia mós hateten katak MJDAK kolabora hamutuk ho Ministériu Edukasaun no Federasaun Futebol Timor-Leste hodi sai organizasaun ida ne'ebé di'ak.

Sport Medicine Timor-Leste, ne'ebé kompostu husi fizioterapia, médiku meteorista, no espesialista saúde mentál, halibur hamutuk iha grupu ida. Sira nia prezensa ohin iha MJDAK no reuniaun kedas ho Ministru MJDAK, Diresaun sira, inklui konfederasaun hotu-hotu. Objetivu husi Sport Medicine mak atu introdús involvimentu Sport Medicine ba eventu tinan ida-ne'e, ho eventu dahuluk mak Sport Medicine Timor-Leste bele hola parte iha Jogos CPLP no mós preparasaun ba eventu internasionál Sea Games nian iha Tailándia.

Prinsípiu ba involvimentu Sport Medicine mak preparasaun ba atleta sira ne'ebé sei kompete, akompañamentu to'o iha tempu kompetisaun rasik. Parte seluk mak Sport Medicine bele ajuda Komisaun husi MJDAK, nomós integra hamutuk ho ekipa saúde ne'ebé mai husi nasaun seluk ne'ebé sei kompete. "Tanba ita hanesan uma-na'in, ita mak koalia iha eventu, atu nune'e sira bele integra sistema Timor-Leste nian, liuliu atendimentu saúde ba jogu refere nomós to'o fila fali ba sira-nia destinasaun rasik," Mediku Desportu ne'e afirma.

Partisipa iha diskusaun ne'e mak Diretór Jerál Desportu, Sport Medicine Fisioterapia, Diretór Desportu Federadu, Prezidente Federasaun sira, Treinadór sira, nomós ekipa téknika sira.

#MídiaMJDAK