Dili, 13 Maiu 2025 – Embaixada Portugál iha Timor-Leste repete ninia kompromisu firme ba Komunidade País sira Lian Portugés (CPLP), hodi reafirma ninia apoiu tomak ba Governu Timor-Leste iha organizasaun no susesu Jogu Desportivu CPLP nian ba dala XII.

Kompromisu ne’e transmite formalmente husi Embaixadora Portugál, Sua Exelénsia Maria Manuela Freitas Bairos, durante enkontru ho Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento (NIS), no Sekretáriu Estadu Arte no Kultura, Sua Exelénsia Jorge Soares Cristovão ne’ebé mós koordena Jogu CPLP 2025 no Konferénsia Ministru Juventude no Desportu CPLP nian ba dala XVI. Sorumutu ne’e hala’o iha Tersa-Feira, 13 Maiu 2025 iha Salaun Magna MJDAK iha Lecidere, Dili.

Durante enkontru ne’e, Ministru NIS fahe detalla krusiál sira kona-ba eventu ne’e, hodi destaka katak, aleinde XII Jogu Desportu CPLP 2025, programa ne’e sei inklui Konferénsia Ministru Juventude no Desportu CPLP nian no Fórum Juventude CPLP nian.

Ministru husu apoiu husi Embaixadór Portugál hodi divulga informasaun esensiál ba embaixadór sira seluk ne’ebé akreditadu iha Timor-Leste no ba naun-rezidente sira, liuliu reprezentante Estadu-membru CPLP nian. Objetivu maka atu asegura katak ema hotu-hotu hetan informasaun ne'ebé klaru no loos, tanba loron ikus ba rejistu online ba atleta sira no ofisiál sira maka loron 15 fulan-Maiu tinan 2025.

XII Jogu Desportivu CPLP nian reprezenta instrumentu signifikativu diplomasia desportiva nian, ho poténsia atu promove lian portugés no kultura riku CPLP nian iha Sudeste Aziátiku, Áfrika no rejiaun sira seluk.

Edisaun tinan 2025 sei hatudu partisipasaun hosi atleta sira iha desportu sia (9), inklui para-atletizmu, ne’ebé sei hala'o hosi loron 17 to'o loron 27 fulan-jullu tinan 2025. Eventu sira sei hala'o iha instalasaun desportiva sira, hanesan Estádiu Munisipál Dili, Jináziu Dili, Kampu Voleiból Praia, Kampu Basketebol MJDAK no Kampu Futeból Kulau Becora.

Marka prezensa mós iha enkontru importante ne’e Diretór-Jerál Desportu, João Rodrigues, ne’ebé okupa mos kargu nu’udar Xefe Misaun ba Jogu Desportu CPLP 2025, Xefe Gabineti MJDAK, Sr. Egas Barros Guterres Godinho, Asesór Tékniku ba Kooperasaun Bilaterál, Sr. Gil da Costa no Diretór Nasionál Rekursu Humanu, Sr. Florindo Napoleaõ D.S. Xavier.

#MídiaMJDAK