DILI, Kinta, 29 Maiu 2025 – Sekretaria Estadu Arte no Kultura (SEAK) ohin hala'o enkontru konsultasaun inisiál ida ho partisipasaun husi liña ministeriál sira, hodi diskute estabelesimentu Konsellu Konsultivu Patrimóniu Kulturál. Enkontru ne'e nu'udar pasu importante ida atu fortalese protesaun no dezenvolvimentu patrimóniu kulturál iha Timor-Leste.

Partisipa iha enkontru konsultasaun ne'e reprezentante sira husi Ministériu relevante hanesan Ministériu Justisa, Ministériu Administrasaun Estatal, Ministériu Obras Públikas, Autoridade Turizmu Timor-Leste (MTA), Centru Nasionál Chega (CNC), Komisaun Nasionál UNESCO Timor-Leste (NATKOM), Universidade Nasionál Timor Lorosa'e (UNTL), no entidade relevante sira seluk.

Objetivu prinsipál husi enkontru ida-ne'e mak atu halibur perspetiva no kontribuisaun husi instituisaun Estadu no akadémika sira atu kria estrutura Konsellu Konsultivu Patrimóniu Kulturál ne'ebé forte no inkluzivu. Konsellu ida-ne'e sei iha papél importante hodi fó asesoramentu tékniku no estratéjiku ba SEAK no Governu iha polítika no implementasaun programa sira kona-ba konservasaun, jestaun, no valorizasaun patrimóniu kulturál Timor-Leste nian.

Liuhusi kolaborasaun interministeriál ida-ne'e, SEAK buka atu garante katak esforsu sira atu proteje no promove patrimóniu kulturál sei halo ho abordajen integradu, ne'ebé konsidera aspetu legál, administrativu, infraestrutura, no edukasaun. Ida-ne'e importante tebes atu asegura sustentabilidade no autentisidade husi riku-nasaun kulturál Timor-Leste nian ba jerasaun agora no futuru.

Foto Kredit : SEAC

#MídiaMJDAK