Díli, 26 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Sua Exelénsia Sekretáriu Estadu Arte no Kultura (SEAK), Jorge Soares Cristovão, no ekipa tekniku MJDAK, halo vizita ofisiál ba laboratóriu produzaun bee potável ho marka Leste Natural Mineral Water (Bee Leste) iha kompaña Leste Food and Beverage Company S.A iha area Kuncin Kasnafar, Postu Adm.Laulara,Munisípiu Aileu.

Vizita ne’e fó oportunidade atu observa diretamente prosesu produzaun bee potável Leste água míneral natural no kapasidade logístika kompaña Leste Food and Beverage Company S.A nudar preparasaun atu sustenta XII Jogos Desportivos CPLP 2025.

Iha tempu ne’e, kompaña Leste food & Leste Food and Beverage Company S.A  konfirmadu sai hanesan patrosinador ofisiál, liuhusi asinatúra Memorandu Entendeimentu (MoU) entre kompaña Leste Food and Beverage Company S.A ho MJDAK.

Ministru Nelyo Isaac Sarmento subliña katak vizita ne’e importante tebes atu haree kapasidade real kompañia ne’e nian atu fornese bee potável ho marka Leste água míneral natural ba atleta sira, autoridade no voluntáriu sira durante Jogos CPLP.

“Governu iha konfiansa ba kompaña Leste Food and Beverage Company S.A, no vizita ida ne’e prova katak sira iha kontrolu ho padraun ne’ebé fó seguransa ba konsumu publikú,” nia hateten.

Chief Executive Officer (CEO) Kompaña Leste Food and Beverage Company S.A, Sr. Ammar Ali Mirza, hatudu laboratóriu no fasilidade produsaun nian ba lideransa MJDAK. Nia garante katak Kompaña Leste Food and Beverage Company S.A prontu atu responde ba demanda logístika durante tempu Jogos CPLP lao.

“Ami sei garante bee potável Leste Natural Mineral Water (Bee Leste) ba atleta, autoridade no voluntáriu sira, iha volume ne’ebé sufisiente no ho kontrolu kualidade.”

Kooperasaun ida ne’e, liuhusi kompaña Leste Food and Beverage Company S.A, mak marka kontribuisaun setór privadu atu sustenta ezekusaun eventu multilateral CPLP iha Timor-Leste, ne’ebé sei akontese iha loron 17-27 fulan Jullu 2025.

#MídiaMJDAK