Dili, 31 Janeiru 2025 – Ministru Juventude, Desportu, Arte, no Kultura (MJDAK), Sua Exelénsia Nelyo Isaac Sarmento (NIS), ohin hala’o fiskalizasaun ofisiál ba Estádiu Munisipál Dili, akompaña husi Diretór Jerál Desportu, Diretóra Nasionál Patrimóniu, Lojístika, no Infraestrutura, no mós ekipa peritu tékniku sira. Vizita ne'e halo parte iha preparasaun governu nian ba Jogu Desportu CPLP nian ne'ebé sei hala'o iha fulan-Jullu 2025.

Durante vizita ba, Ministru Nelyo Isaac subliña nesesidade ba hadi'ak sira, hodi fó instrusaun ba ekipa téknika atu haree ba área xave sira ne'ebé presiza hadi'a. "Ami sei hadi'a aspetu oioin hosi estádiun hodi garante katak nia kumpri padraun nesesáriu sira ba kompetisaun internasionál", NIS afirma.

Hafoin inspesaun ne’e,  Ministru NIS sei hasoru malu ho Sua Exelénsia Gastão Sousa, Ministru Planeamentu Estratéjiku Investimentu, hamutuk ho tékniku sira husi Ajénsia Dezenvolvimentu Nasionál (ADN). Enkontru ne’e sei foka ba atualizasaun infraestrutura no dezenvolvimentu nesesáriu ba estádiu ne’e atu sai uma-na’in ho susesu ba Jogu Desportu CPLP. 

Falta de’it fulan hirak ba eventu desportivu prestijiozu ne’e, governu servisu maka’as hodi garante katak Timor-Leste preparadu ho di’ak hodi simu atleta no delegadu sira husi Komunidade País Lian Portugés (CPLP) tomak.

#MédiaMjdak