Díli, 3 Fevereiru 2025 – Ministériu Juventude, Desportu, Arte no Kultura (MJDAK), lideradu husi Sua Exelénsia Ministru Nelyo Isaac Sarmento (NIS), hamutuk ho Diretór Jerál Desportu (DJD) João M. Rodrigues, hasoru malu ho Prezidenti Federasaun Boxe Amadora João J. Fernandes no ekipa téknika atu diskute planu no atividade ba kompetisaun SEA Games 2025. Diskusaun ne’e hala’o iha Salaun Magna MJDAK, Lecidere, Díli, Timor-Leste.

Iha reuniaun ne’e, Prezidenti Federasaun Boxe Amadora, João J. Fernandes, apresenta planu atividade kompetisaun ne’ebé kompostu husi eventu 4 prinsipais:

1.     Kampionatu ba loron PNTL – Kompetisaun ida ne’ebé sei hala’o ba homenajeia Polísia Nasionál Timor-Leste (PNTL).

2.     Kompetisaun ABC SEA Games Juniór – Eventu ida atu fó oportunidade ba atleta foun atu prepara-an ba SEA Games.

3.     Kompetisaun ba loron Restaurasaun Independénsia – Sei hala’o iha loron 15 Maiu 2025, hodi marka momentu importante iha istória nasional.

4.     Partisipasaun iha Kompetisaun SBC iha Qatar – Atleta sira sei partisipa iha kompetisaun internasionál iha Fulan Juñu 2025, no fó oportunidade ba árbitru sira atu hetan esperiénsia.

5.      

“Ami hakarak relata ba Sua Exelénsia Ministru kona-ba preparasaun sira, inklui oportunidade ba árbitru sira atu hetan esperiénsia iha eventu internasionál,” hateten Prezidenti Boxe.

Ministru Nelyo Isaac Sarmento subliña katak, maski iha dezafiu ne’ebé federasaun sira hasoru, prioridade tenke fó ba preparasaun atleta sira ba Sea Games 2025.

“Tinan ida ne’e mak tinan importante ba presatasaun atleta sira. Ami ezije katak federasaun sira hahú identifika no halo selesaun ba atleta sira ne’ebé sei partisipa iha Sea Games. Selesaun final tenke kompleta antes fulan Novembru 2025,” hateten Ministru NIS.

Ministru mós subliña katak Governu sei kontinua fó prioridade ba desportu, inklui boxe amadora, atu asegura katak Timor-Leste bele reprezenta an ho di’ak iha eventu internasionál.

Diskusaun ne’e mós partisipadu husi Diretór Nasionál Desportu Federado (DNDF), Oscar Dias Quintas, Xefi Departamentu Alta Kompetisaun, Josefina Jeca Pinto, no asesór sira no teknika sira husi Federasaun Boxe Amadora.

SEA Games ba dala 33 ne'e sei realiza iha Thailandia loron 9-20 fulan Dezembru tinan 2025. Autoridade Desportu Tailándia nian (SAT) hili provínsia tolu—Rejiaun Metropolitana Bangkok, provínsia Chonburi, no provínsia Songkhla—atu sai uma-na'in ba Jogu refere.

#MédiaMjdak