DILI, 23 Maiu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, no Sekretáriu Estadu Arte no Kultura (SEAK), Sua Exelénsia Jorge Soares Cristovão, ne'ebé mós nu'udar Koordenadór Jerál ba jogu CPLP, ohin hala'o reuniaun koordinasaun ho Membru Komisaun Organizadora. Reuniaun ne'e, hala'o iha Salaun Sekretariadu CPLP iha Centro Convenção Dili (CCD) eis Merkadu Lama, diskute progresu preparasaun servisu no kondisaun atleta sira-nian ba eventu XII Jogos Desportivos CPLP 2025, ne'ebé sei akontese iha Dili iha fulan Jullu tinan ida-ne'e.

Ministru Nelyo Isaac Sarmento (NIS), hanesan mós Prezidente Komisaun Organizadora ba jogu ne'e, fó informasaun kona-ba prosesu preparasaun atleta timoroan sira ne'ebé sei reprezenta Timor-Leste. Atleta sira ne'e hahú ona faze konsentrasaun iha Sentru Treinamentu no Akomodasaun iha Otél Ramelau, Díli, hafoin selesaun rigorozu husi federasaun desportiva sira. Ministru Nelyo Isaac konfirma katak preparasaun la'o ho progresu pozitivu.

"Haree husi prosesu preparasaun atleta sira-nian, ita kontente tanba sira nia dezenvolvimentu la'o ho di'ak no disiplina mós di'ak. Komisaun Organizadora sei kontinua monitoriza no fó suporta tékniku," hateten Ministru Nelyo.

Durante estadia iha sentru treinamentu, atleta sira iha kordenasaun rigorozu ho treinadór sira no ekipa ofisiál, atu aumenta nivel preparasaun téknika no físika. Paralelamente, tanba maioria atleta sira mak estudante, MJDAK halo koordenasaun ho Ministériu Edukasaun atu evita kompromete sira nia prosesu akadémiku.

"Ministériu Edukasaun sei ajuda identifika eskola sira iha Díli atu akomoda atleta sira ne'ebé mai husi munisípiu seluk. Fasilita mós transporte hodi fasilita sira husi otél kontinua ba eskola," dehan Ministru NIS.

Ba estudante sira ne'ebé iha oráriu eskolár dader no lokraik, programa treinamentu adapta ona, hodi permite sira kontinua formasaun akadémika no desportiva paralelamente.

MJDAK no instituisaun relevante sira kontinua fó prioridade ba preparasaun atleta sira atu reprezenta Timor-Leste ho dignidade iha jogu CPLP, ida-ne'e hanesan momentu importante ba promosaun imajen nasionál no unidade juventude iha rai laran no rai li'ur.