DÍLI, 12 Juñu 2025 – Sua Exelénsia Ministru Juventude, Desportu, Arte no Kultura (MJDAK) no Prezidente Komisaun Organizadora XII Jogos Desportivas CPLP 2025, Nelyo Isaac Sarmento, hamutuk ho Sua Exelénsia Sekretáriu Estadu Arte no Kultura (SEAK) no Koordenadór Jerál ba eventu refere, Jorge Soares Cristovão, ohin selebra asinatura akordu parseria ho Timor Telecom S.A. Serimónia ne'e hala'o iha salaun Magna MJDAK, Lecidere, Díli.

Iha komunikadu imprensa, Prezidente Komisaun Organizadora, Nelyo Isaac Sarmento (NIS), hato'o agradesimentu ba Timor Telecom, ne'ebé sai nu'udar kompañia ikus ne'ebé hakarak fó parseria ba XII Jogos Desportivas CPLP 2025, ne'ebé falta fulan ida ho balun de'it ona. "Iha naran Governu, ha'u agradese ba Timor Telecom ne'ebé iha vontade hodi partisipa iha eventu ida-ne'e nu'udar parseria teknolojika ida ba eventu," dehan Ministru Nelyo Isaac.

Ministru mós salienta katak eventu internasionál desportiva ba país CPLP sira-ne'e sei hetan susesu boot bainhira hotu-hotu, tantu setór públiku no setór privadu, hamutuk. "Ita espera katak ho intensaun Timor Telecom nian mai nu'udar na'in ida iha eventu ida-ne'e, ita hotu espera katak eventu XII Jogos Desportivas CPLP 2025 ne'e sei hetan susesu," nia afirma.

Iha fatin hanesan, Administradora Delegada Timor Telecom S.A., Sra. Maria Rita Santos de Sampaio Nunes, hatete katak eventu ida-ne'e importante tebes tanba la'ós de'it ida ne'ebé hamutuk nasaun oioin, maibé mós dezenvolve parseria boot ida entre sira ne'ebé mak país sira ne'ebé ko'alia lian portugés. Timor Telecom sente orgullu tebes atu kontribui, liuliu liuhusi transmisaun direta jogu sira.

Nia esplika katak liuhusi transmisaun direta, eventu ne'e bele disemina ba país CPLP sira hotu no iha Timor, atu nune'e juventude sira iha país ne'e bele akompaña jogu sira liuhusi média. "Desportu hanesan tema ida ne'ebé hamutuk ema no lori prinsípiu no valór sira ne'ebé importante tebes ba dezenvolvimentu sosiedade nian," dehan Sra. Maria Rita.

Liuhusi parseiru no apoiu ida-ne'e, Timor Telecom orgullu mós atu kontribui ho equipamentu teknolojiku balun atu ajuda dezenvolvimentu jogu sira no dezenvolvimentu ema ne'ebé partisipa. "Ami mós orgullu boot tebes atu liuhusi ami-nia servisu no produtu sira bele kontribui ba eventu tomak ne'e no hanesan Ministru dehan, ami prontu atu apoia eventu futuru sira ne'ebé ajuda dezenvolve país furak ida-ne'e, Timor-Leste," nia konklui.

Asinatura Akordu Parseiru ho Timor Telecom S.A. ne'e hetan mós partisipasaun husi Xefe Gabinete MJDAK, Diretór Jerál Desportu, Diretór Jerál Servisu Korporativu, Asesór Planeamentu, Programasaun no Bilaterál, Asesór Komunikasaun no Relasaun Públika, Asesora Konsultoria no Marketing, delegasaun husi Timor Telecom, no Koordenadora GCI-MJDAK.

#MídiaMjdak