Dili, 7 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ativamente partisipa iha sorumutu Konsellu Ministrus (KM) ne’ebé hala’o iha Palásiu Governu, Dili, ohin, loron 7 fulan-maiu tinan 2025. Iha sorumutu ne’e, membru governu sira aprova desizaun krusiál oioin ne’ebé aborda dezafiu nasionál, planu estratéjiku, no reforma importante iha área edukasaun, infraestrutura, jestaun funsionáriu públiku, no integrasaun rejionál.

UNTL Sei Moderniza ho Estatutu Foun

Liuhosi proposta ne’ebé aprezenta husi Sua Exelénsia Ministru Ensinu Superiór, Siénsia no Kultura, José Honório Jerónimo, no Reitór Universidade Nasionál Timor Lorosa’e (UNTL), João Soares Martins, Konsellu Ministrus aprova projetu Dekretu-Lei kona-ba Estatutu foun UNTL nian. Diploma legál ida ne’e define reforma organizasionál komprehensivu ida hodi ajusta estrutura UNTL ba ezijénsia ensinu superiór atuál no atu kontribui efetivamente ba dezenvolvimentu nasionál.

Governu Investe Millaun $15 iha Estrada Dotik-Alas

Konsellu Ministrus aprova mós proposta husi Sua Exelénsia Ministru Obras Públikas, Samuel Marçal, hodi autoriza despeza ba konstrusaun trosu estrada Dotik–Alas ho naruk 16,25 km iha Munisípiu Manufahi. Ho valór investimentu ne’ebé prevee hamutuk USD 15,396,000, projetu infraestruturál ida ne’e sei fasilita asesu no mobilidade ba komunidade lokál no sei impulsiona dezenvolvimentu ekonómiku iha área refere.

Rekrutamentu Funsionáriu Públiku Sei Suspende Temporariamente

Tuir aprezentasaun husi Prezidente Komisaun Funsaun Públika, Agostinho Letêncio de Deus, Konsellu Ministrus aprova suspensaun temporária ba prosesu rekrutamentu funsionáriu públiku foun. Medida ida ne’e nu’udar parte integrál husi reforma jestaun rekursus umanus iha Administrasaun Públika, ho objetivu atu aumenta efisiénsia no sustentabilidade iha setór públiku. Maske nune’e, prosesu bazeia ba méritu ba kargu diresaun no rekrutamentu espesiál sei kontinua la’o.

Lei Bazes Edukasaun Sei Revizaun hodi Promove Edukasaun Inkluzivu

Sua Exelénsia Ministra Edukasaun, Dulce de Jesus Soares, aprezenta proposta alterasaun ba Lei Bazes Edukasaun foun, ne’ebé elabora husi Komisaun G Parlamentu Nasionál. Revizaun lejislativa ida ne’e ho intensaun atu promove edukasaun inkluzivu, adapta kurríkulu ba realidade sosio-kulturál Timor-Leste nian, no valoriza papel esensiál dosente sira-nian.

Timor-Leste Avansa iha Prosesu Adezaun ba ASEAN

Vise-Ministra ba Asuntu ASEAN, Milena Maria da Costa Rangel, aprezenta pontu situasaun detalladu kona-ba progresu prosesu adezaun Timor-Leste nian nu’udar membru plenu ASEAN, hodi atualiza membru governu sira kona-ba estadu atual prosesu integrasaun rejionál ne’e.

Governu Aprova Planu Konstrusaun Aeroportu Internasionál Foun

Konsellu Ministrus aprova konseitu projetu ambisiozu ba konstrusaun Aeroportu Internasionál Prezidente Nicolau Lobato foun. Inisiativa estratéjiku ida ne’e nu’udar parte husi vizaun governu nian ba modernizasaun infraestruturál no fasilitasaun mobilidade internasionál, hodi estimula konektividade no kresimentu ekonómiku.

Atu hetan informasaun ofisiál MJDAK nian, favor vizita regularmente website ofisiál no plataforma komunikasaun sosiál ministériu nian.

#MediaMJDAK