Díli, 22 Maiu 2025 – Konsellu Ministru hala’o reuniaun regular iha Palásiu Governu, Dili, ho partisipasaun husi Ministru Juventude, Desportu, Arte no Kultura, Sr. Nelyo Isaac Sarmento, atu diskute no aprova proposta lejizlativa xave no nomeasaun estratéjika ne’ebé konsideradu krusial ba dezenvolvimentu ekonómiku no interese soberanu Timor-Leste nian.

Proposta Lei Sistema Finanseiru no Atividade Bankária

Konsellu Ministru konsidera no halo revizaun ba proposta lei kona-ba Rejime Jerál Sistema Finanseiru no Atividade Bankária, ne’ebé aprezenta husi Vise-Primeiru Ministru no Ministru Koordenadór Asuntu Ekonómiku, Francisco Kalbuadi Lay, no Governadór Banku Sentrál Timor-Leste (BCTL), Helder Lopes.

Proposta lejizlativa ne’e iha objetivu atu estabese enkuadramentu legál modernu ida ba sistema finanseiru nasionál, ho finalidáde atu hatu’u base legál sira atu garanti estabilidade, konfiansa no efisiénsia iha setór bankáriu. Lejislasaun ne’e mós pretende aliña sistema finanseiru Timor-Leste ho prinsipiu supervizaun no regulasaun internasionál, atu sustenta ekonomia ida ne’ebé dinámiku no inkluzivu.

Nomeasaun ba Konsellu Supervizaun Greater Sunrise

Iha reuniaun ne’e, Konsellu Ministru autoriza Ministru Petróleu no Rekursu Minerais atu nomeia Avelino Maria Coelho da Silva no José Manuel Gonçalves nu’udar komisáriu Timor-Leste ba Konsellu Supervizaun Greater Sunrise.

Konsellu ida-ne’e iha responsabilidá atu monitora no fiscaliza implementasaun Rejime Espesiál Greater Sunrise, tuir Tratadu Fronteira Marítima entre Timor-Leste no Austrália. Nomeasaun ne’e pretende garante representasaun efikaz ba Timor-Leste iha tomak desizaun estratéjiku, ho kolaborasaun estretu ho Primeiru-Ministru no Ministru tutelar, atu salvaguarda interese soberanu nasionál.

Lei Pestisida Hetan Aprovasaun

Konsellu Ministru aprova esbosu Lei Pestisida, aprezenta husi Ministru Agrikultura, Pekuária, Peskas no Floresta, Marcos da Cruz. Lei ne’e sei regula aspétu sira relasiona ho lisensiamentu, importasaun, eksportasaun, produsaun, fa’an, distribuisaun, utilizasaun, embalajen no soe pestisida iha Timor-Leste.

Objetivu lei mak atu proteje saúde públika, animal, ai-horis, ambiente terrestre no tasi, no ao mesmo tempo promove prátika agríkola ida ne’ebé seguru no sustentável.

Estensaun Projetu Estrada Baucau–Venilale no Venilale–Viqueque

Konsellu Ministru aprova estensaun servisu supervizaun konsultoria ba projetu estrada:

Lote 1: Baucau – Venilale ; Lote 2: Venilale – Viqueque

Estensaun sei valida to’o 31 Janeiru 2026, ho aumentu valór kontratu husi USD 5.78 milhãon ba USD 6.73 milhãon, ne’ebé inklui aumentu estimadu aproxima USD 5,000.

#MídiaMJDAK