Díli, 26 Maiu 2025 – Ministériu Juventude, Desportu, Arte no Kultura (MJDAK), liideradu husi Sua Exelénsia Ministru Nelyo Isaac Sarmento, akompaña husi Koordenadór Jerál Jogos CPLP no Sekretáriu Estadu Arte no Kultura (SEAK), Sua Exelénsia Jorge Soares Cristovão, hamutuk ho Diretóra Jerál Servisu Korporativu (DJSK), Isabel Adalziza Fátima Rodrigues Ferreira, no asesór sira, asina akordu kooperasaun ho Kompañia Leste Food and Beverage Company S.A koñesidu ho Bee Leste atu fó kontribuisaun logístiku ba realizasaun XII Jogus Desportivas  CPLP tinan 2025. Seremónia asinatúra ne’e realiza iha edifisiu kompaña Leste Food and Beverage Company S.A iha area Kuncin-Kasnafar, Postu Adm.Laulara,Munisípiu Aileu.

Akordu ne’e fó klaridade ba kompaña Leste Food and Beverage Company S.A nia kompromisu atu fó apoio bee potável ho marka Leste Natural Mineral Water (Bee Leste) durante realizasaun Jogus CPLP 2025, hanesan parte husi kontribuisaun responsavél sosial ba eventu rejional ne’ebé importante tebes ba Timor-Leste.

Notísia relevante: MJDAK–SEAK Vizita Laboratóriu Bee Leste Atu Verifika Kapasidade Apoiu Jogos CPLP 2025  https://mjdac.gov.tl/notisia/detail/5f93f983524def3dca464469d2cf9f3e/

Iha okaziaun ne’e, Ministru Nelyo Isaac Sarmento (NIS) hateten “Governu agradese ba parte hotu, liu-liu ba Kompaña Leste Food and Beverage Company S.A ne’ebé ho intensaun di'ak hakarak sai parte integrál iha Jogus CPLP 2025. Akordu ida ne’e la’os deit kona-ba bee ho marka Leste água míneral natural, maibé mós kontribuisaun ba atributu seluk hanesan souvenir, kamizola no ekipamentu logístiku.”

Ministru subliña katak realizasaun Jogus CPLP la’os deit responsabilidade governu mesak, maibé ezije kolaborasaun hosi setor privado, organizasaun sivil no komunidade nian.

“Jogus CPLP mak festa nasionál, no responsabilidade ida ba ema hotu. Sira ne’ebé iha kapasidade, tenke kontribui ba estadu liuhosi buat ne’ebé sira iha,” nia dehan.

Chief Executive Officer (CEO) Kompaña Leste Food and Beverage Company S.A, Sr. Ammar Ali Mirza, hato’o sentidu orgullu tanba hetan konfiansa husi Ministériu.

“Ami sente honra no fiar tanba hetan oportunidade ida ne’e. Ami sei garante bee potável ho marka Leste Natural Mineral Water (Bee Leste) ba atleta sira no partisipante sira hotu durante Jogus CPLP la’o, hanesan kontribuisaun direta ba susesu eventu ne’e,” hateten CEO Ammar Ali.

Akordu ida ne’e marka pasu konkretu ba fortalese parserias públiku–privadu iha Timor-Leste, hodi sustenta organizasaun profesionál no sustentável ba eventu multilateral CPLP 2025.

#MídiaMJDAK