Dili, 11 Fevereiru 2025 – Ministériu Juventude, Desportu, Arte no Kultura (MJDAK) hala’o enkontru Komité Diretiva Projetu ho partisipasaun husi Sua Exelénsia Ministru Nelyo Isaac Sarmento (NIS), Diretór Nasionál KOICA Younhwa Kang no Vise Country Diretór Sunghwan Jang. Enkontru ne’e ho objetivu atu ko’alia kona-ba aprezentasaun relatóriu projetu Kampu Futeból Akademia nian iha Becora, Bidau, Kampung Alor no Comoro, inklui planu operasionál ba tinan 2025. Atividade ne’e hala’o iha Salaun Magna MJDAK nian, iha Lecidere, Dili.

Iha enkontru ne’e, Sua Exelénsia Ministru Nelyo Isaac Sarmento (NIS) destaka importánsia kooperasaun kontinua entre MJDAK no KOICA ba kompleta infraestrutura Kampu Futeból Akademia iha Becora, Bintang Bidau, Kampung Alor no Malinamuk Comoro. Ministru ne’e reforsa tan katak, to’o ohin loron, Governu seidauk simu prazu entrega ofisiál husi KOICA.

"Ami repete ami nia pedidu ba KOICA atu aselera servisu, tanba sei iha kestaun balun ne'ebé pendente atu finaliza. Iha tinan 2025, ami sei hala'o liga futeból juvenil ba atleta sub-16, no kampu sira ne'e sei sai esensiál ba treinu no selesaun jogadór sira, la'ós de'it hosi Díli, maibé mós hosi munisípiu sira, sei sai hanesan oportunidade ida hodi avalia dezempeñu no konta sira hosi atleta sira. KOICA nia kolaborasaun atu nune’e projetu ne’e bele la’o ba oin no kontribui ba dezenvolvimentu futeból juvenil iha Timor-Leste Iha momentu ne’e Governu garante hela seguransa ba infraestrutura atu nune’e ita bele simu ofisialmente kampu sira wainhira entrega ona,” dehan Ministru NIS.

Aleinde ne’e, governante ne’e husu apoiu ba KOICA hodi hadi’a kampu futeból iha munisípiu Aileu, Ainaro, Manufahi no Viqueque, hodi posibilita realiza jogu juvenil sira. NIS mós sujere atu kontinua halo rekrutamentu ba Akademia Futeból, ho objetivu atu kapasita no hametin mentalidade atleta joven sira iha kada munisípiu.

Iha enkontru ne’e hetan mós partisipasaun husi Diretora-Jerál Servisu Korporativu (DJSK), Isabel Adalziza Fátima Ferreira Rodrigues, Diretór-Jerál Desportu (DJD), João M. Rodrigues, Diretór Nasionál Patrimóniu, Lojístika no Infraestrutura (DNPLI), Maria Luísa Monteiro no mós asesór MJDAK inklui ofisiais sira husi KOICA no FFTL.