Dili, 22 Janeiru 2025 – Ministru Juventude, Desportu, Arte no Kultura (MJDAK), Exelensia Nelyo Isaac Sarmento, partisipa iha sorumutu Konsellu Ministrus ne’ebé hala’o iha Palásiu Governu, Dili. Sorumutu ne’e aprova projetu Rezolusaun Governu aprezenta husi Ministru Prezidénsia Konsellu Ministrus, Agio Pereira, ho desizaun atu renova mandatu Jaime Fernando dos Mártires Carvalho Correia nian nu’udar Prezidente Konsellu Diretivu Imprensa Nasionál Timor-Leste, I.P.

Desizaun ne’e bazeia ba kapasidade téknika, esperiénsia no kompeténsia komprovada ne’ebé Jaime Correia hatudu iha jestaun entidade ida-ne’e, atu asegura kontinuidade no dezempeñu funsaun ne’ebé fó prioridade ba izensaun, imparsialidade no idoneidade. Mandatu foun ne’e sei dura tinan haat.

Iha sorumutu nee, Ministru Prezidénsia Konsellu Ministrus halo aprezentasaun kona-ba Rejimentu Konsellu Ministrus, ho objetivu atu hadi’a funsionamentu reuniaun Konsellu Ministrus no aperfeisoa prosedimentu lejizlativu Governu Konstitusionál da-9 nian.

Ministru Prezidénsia Konsellu Ministrus, Agio Pereira, hamutuk ho Koordenadór Gabinete Dezenvolvimentu Polítikas Públikas Estratéjikas, André Monteiro, halo aprezentasaun kona-ba Saúde Dijitál (e-saúde). Saúde Dijitál mak aplikasaun teknolojia informasaun no komunikasaun iha área saúde, ne’ebé Organizasaun Mundiál Saúde (OMS) define hanesan téknika, prátika no atitude hodi kontribui ba efisiénsia sistema saúde.

Sistema saúde dijitál bele lori mudansa signifikativu ba Timor-Leste, transformando prosesu manuál ne’ebé lori tempu naruk sai solusaun dijitál ne’ebé efisiente. Rejistu klíniku eletróniku sentralizadu sei garante asesu no sinkronizasaun dadus iha tempu reál, no promove efisiénsia, modernizasaun, ho hadi’a kualidade servisu saúde ba populasaun.

#MédiaMjdak