DILI, 18 Fevereiru 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, akompaña husi Sekretáriu Estadu Arte no Kultura (SEAK), Sua Exelénsia Jorge Soares Cristovão, hala'o reuniaun ho Prezidente Associação Empreendedorismo e Gestão Cultural de Timor-Leste (AEGC-TL), Sra. Mirabila Sarmento, no Prezidente Assembleia Jerál, Sra. Ana Guterees. Enkontru ne'e ho objetivu atu ko'alia kona-ba área turizmu, no hala'o iha Salaun Magna MJDAK, Lecidere, Díli.

Iha diskusaun ne'e, Ministru Nelyo Isaac Sarmento (NIS) hatudu ninia interese ba esplikasaun kona-ba Jogos Comunidade dos Países de Língua Portuguesa (CPLP) nian, tanba ne'e primeira vez Timor-Leste sai uma-na'in. "Jogu eskolár ida-ne'e Paízes CPLP mós hakarak hatene Timor nia karater ne'e hanusa, oinsá ita atu promove ita-nia kultura ne'e iha Paízes kolia lian Portugés sira nia partisipasaun sira iha jogu ne'e, no saida mak ita atu prepara durante semana ida nia laran, oinsá ita bele lori atleta no ofisiál sira ba haree ita-nia fatin kulturál turizmu sira," Ministru Nelyo Isaac hateten.

Ministru NIS mós dignifika katak empreendedorizmu balun ba grupu joven sira ne'ebé iha intensaun hakarak partisipa no dezenvolve ajénsia turizmu kulturál sira nian ne'e importante tebes. Nia subliña katak husi inisiativa hanesan ne'e, bele identifika fatin kulturál Timor nian ne'ebé iha atividade tinan-tinan, hanesan iha Maubesi. "Ida-ne'e ita uza oportunidade ida-ne'e, tanba liu husi ne'e maka ita dada turista husi paíz sira mai bele hetan lukru," nia akresenta.

Nelyo Isaac Sarmento mós husu ba AEGC-TL atu prepara planu no programa klaru, inklui orsamentu ne'ebé detallu, atu nune'e Governu bele fó apoiu ne'ebé efetivu. Nia fó ezemplu kona-ba fatin turizmu sira ne'ebé lokaliza iha Lospalos ho ninia paizajen furak ne'ebé presiza duni esplora.

Iha sorin seluk, Prezidente AEGC-TL, Sra. Mirabila Sarmento, subliña katak objetivu prinsipál husi reuniaun ne'e mak atu promove sira-nia atividade balun ne'ebé atu hala'o iha tinan 2025 ho naran "Fitun - Festival Liga ba Loron Kultura", ne'ebé sei akontese iha fulan Outubru. Aleinde ida-ne'e, nia mós aprezenta asosiasaun nia naran kompletu hanesan Associação Empreendedorismo e Gestão Cultural de Timor-Leste, ne'ebé prepara hela eventu ida iha kontestu ba loron independénsia ba dala 50, nomós ba tomada de posse Timor-Leste nian nu'udar membru primeiru ba ASEAN. Partisipasaun iha Jogos CPLP mós importante liu ba turizmu kulturál. Asosiasaun ne'e harii iha 2023 no kompostu ho membru 60.

#MídiaMJDAK