DILI, 27 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha selebrasaun loron aniversáriu Unidade Polísia Marítima (UPM) nian ba dala XXII. Seremónia ne'e hala'o iha Kuartel UPM Lecidere, Díli.

Ministru Nelyo Isaac Sarmento (NIS) mós akompaña diskursu ne'ebé hato'o husi Ministru Interiór (MI), Francisco Guterres, ba selebrasaun UPM nia aniversáriu. Iha ambitu selebrasaun ne'e, Ministru Interiór Francisco Guterres realsa ba membru UPM sira katak UPM nia ezisténsia importante tebes ba Estadu, tanba Timor-Leste hanesan nasaun kontinentál ho fronteira tasi nian ne'ebé luan liu fali fronteira terestre, hahú husi Norte, Súl, Leste, no Oeste.

"Tanba ne'e mak ezisténsia Unidade Polísia Marítima ne'e importante tebes atu bele asegura atividade ne'ebé la'o iha fronteira marítima ho di'ak no prevene atividade ilegál ka ilísita sira ne'ebé mosu iha fronteira marítima," Ministru Interiór afirma. Nia salienta katak papel UPM nian importante tebes atu prevene krime transnasionál sira ne'ebé liu husi tasi, hanesan tráfiku droga no peska ilegál.

Ministru Guterres mós hateten katak UPM servisu hamutuk ho Komponente Navál husi F-FDTL, no mós parseiru Estadu sira seluk hanesan Karatina, Alfándega, no Imigrasaun, ne'ebé tau matan ba fronteira marítima. Tanba ne'e, Governu iha dever atu investe iha Unidade Polísia Marítima hodi kapasita no prepara membru sira atu bele responde ba ameasa sira ne'ebé kada tinan sempre mai ho forma diferente no diversifikadu.

Enkuantu, Segundu Komandante PNTL, Komisáriu Pedro Belo, fó mensajen ba membru UPM tomak atu mantein mentalidade no disiplina hodi halo tuir lei no orden, atu nune'e bele fó seguransa másimu ba fronteira marítima ka kosteira. Nia rekoñese katak tasi Timor nian luan tebes, no dala ruma kolokasaun membru sira dook husi família, maibé ida-ne'e labele hamate espíritu servisu nian, liuliu iha área marítima ne'ebé involve risku.

"Seguransa marítima mak liña dahuluk ne'ebé absorve ameasa esterna nian. UPM mak matan, tilun, ibun, liman, ain husi tasi luan nia klaran," Komisáriu Pedro Belo dehan, hodi hatudu importánsia UPM nian.

Iha selebrasaun UPM ne'e, mós fahe sertifikadu apresiasaun no louvor ba membru UPM no funsionáriu ne'ebé servisu iha Kuartél UPM nian. Atividade ne'e hetan partisipasaun másimu husi entidade importante sira, hanesan Sekretáriu Estadu Peska, Sekretáriu Estadu Protesaun Sivíl, Embaixadór Japão no Malázia, Adidu Polísia POLRI, GNR, Reprezentante CEMGFA-FDTL, Komodoru F-FDTL, Komandante UEP, no AES-PNTL sira.

#MídiaMJDAK