DÍLI, 11 Maiu 2025 – Ministériu Juventude, Desportu, Arte no Kultura (MJDAK), liuhusi Gabinete Ministru, inaugura ofisiál Sentru Formasaun Nasionál ba Jogu CPLP 2025 iha Otél Ramelau, Dili, iha loron Domingu. Serimónia ida-ne’e marka abertura formasaun ba atleta Timor-Leste na’in 116, ne’ebé sei representa nasaun iha kompetisaun CPLP, iha fulan Jullu tinan ne’e.

Serimónia ne’e prezidi husi Xefe Gabinete MJDAK, Egas Barros Guterres Godinho, no Diretór Jerál Desportu, João Rodrigues, ne’ebé mós hanesan Xefe Delegasaun ba Jogu CPLP 2025.

Iha mensajen husi Sua Ekselénsia Ministru Nelyo Isaac Sarmento, ne’ebé hato’o husi Xefe Gabinete, subliña katak ekipa ne’e mak figura uma-na’in Timor-Leste iha plataforma internasionál. “Imi sira mak representa bandeira Timor-Leste. Imi-nia hahalok, disiplina no esfortsu sei hatudu kona ba ezemplu juventude patriótiku nian,” hatete Sr. Godinho.

Tanba ne’e, S.E. Ministru apela ba atleta sira atu kaer metin prinsipiu desportividade, mantén komunikasaun efetivu ho treinadór no ofisiál sira, no respeita rejime treinu ne’ebé dehan. “Disiplina, foku no profisionalizmu mak dalan atu hetan rezultadu di'ak,” nia akresenta.

Atleta sira, ne’ebé selezionadu hosi disiplinas desportivas sia (9), sei hela iha Otél Ramelau durante tempu preparasaun, ho suportu hosi ekipa médiku ba monitorizasaun no assisténsia saúde kontínuu.

Diretór Jerál Desportu, João Rodrigues, hatete katak MJDAK iha koordenasaun ho autoridade edukasionál sira, inklui Ministériu Edukasaun atu garanti estudante-atleta sira bele kontinua sira-nia estudu enkuantu hala’o preparasaun. “Ekipamentu desportivu sei distribui iha tempu badak atu fasilita preparasaun atleta sira ba nivel internasionál,” nia dehan.

“Iha kapasidade organizativu hanesan uma-na’in ba Jogu CPLP ba dala XII, Timor-Leste fó prioridade ba organizasaun rigorózu no prestíjiu ba ekipa nasionál. Ami konfia katak atleta sira sei fó onra ba bandeira nian,” Sr. Rodrigues konklui.

Serimónia abertura hetan partisipasaun husi reprezentante federasaun sira, asesór tékniku MJDAK, Xefe Gabinete Sekretáriu Estadu Arte no Kultura, no inan-aman atleta sira.

Jogu CPLP ba edisaun XII sei hala’o iha Dili hosi loron 17 to’o 27 fulan Jullu, 2025, ho partisipasaun hosi nasaun lusófona sira tomak.

#MídiaMJDAK