DÍLI, 10 Juñu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, apresia  ho prestasaun Boxista Fabião Correia Monteiro husi Lospala Boxing Club. Ministru hato'o parabéns ba Boxista Fabião Correia Monteiro ne'ebé hatudu prestasaun di'ak tebes, liu husi esforsu individuál konsege hadau sintu BWS (World Boxing Syndicate) no lori rezultadu di'ak ba nasaun Timor-Leste.

Iha intervista ida, Sua Exelénsia Ministru Nelyo Isaac Sarmento (NIS) hatete katak Timor-Leste iha modalidade lima ne'ebé fó prestíjiu ba nasaun, hanesan Boxing, Taekwondo, Karate-Do, Atletizmu, no Futeból. "Modalidade lima ne'e sai ezersísiu di'ak ba Timor-oan sira ne'ebé hakarak. Aleinde futeból, modalidade Boxing ne'e joven barak mak gosta," dehan Ministru.

Ministru mós rekoñese katak, maski dezenvolvimentu jerál ba modalidade desportu seidauk la'o di'ak, maibé liuhusi individu joven sira-nia hakarak makas, sira konsege hetan prestasaun iha nível profisionál. "Ohin, ita iha tan Boxista Fabião Correia Monteiro nia partisipasaun iha kompetisaun Boxing iha Jakarta no hetan prestasaun di'ak, manán boxista sira seluk iha ne'ebá. Ohin loron, nia hakarak hatudu ba ita katak talentu Boxing Timor-oan mós aumenta tan, no ita presiza fó atensaun," nia subliña.

Ministru agradese ba Boxista Fabião nia klubu no família sira ne'ebé fó apoiu individuál hodi halo nia bele to'o iha fatin kompetisaun no ikus mai hetan prestasaun ne'e. Ida-ne'e hatudu pasu di'ak ida, no tuir mai Governu bele haree oinsá atu sira-nia partisipasaun bele integra iha eventu nasionál sira.

Aleinde ne'e, Ministru mós enkoraja nafatin atleta Fabião atu bele kontinua nia karreira profisionál iha Boxing, no labele mete buat ruma ne'ebé la fó rezultadu di'ak ba nasaun no ba família.

Boxista Fabião Correia Monteiro akompaña husi nia família, Vise-Prezidente Federasaun Boxing Timor-Leste, Treinadór Fabião Correia Monteiro nian, inklui Prezidente Interinu Lospala Boxing Club.

#MídiaMJDAK