DÍLI, 11 Jullu 2025 – Komisaun Nasionál Desportu (KND), liuhosi Sekretáriu Ezekutivu Cesarino da Silva, hamutuk ho Karry Pitcher Galhos no ekipa fasilitadór, hala’o formasaun edukasaun anti-doping ba atleta selesaun nasionál sira ne’ebé sei reprezenta Timor-Leste iha XII Jogu Desportivu CPLP 2025. Atividade ne’e hala’o iha Salaun Hotel Ramelau, Ai-Mutin, Díli.

Iha abertura, Sekretáriu Ezekutivu KND hateten katak objetivu prinsipal formasaun ne’e mak atu fó edukasaun kona-ba regulamentu internasionál anti-doping, inklui informasaun ba substánsia proibida, direitu no responsabilidade atleta, ho prosedimentu testu dopajen.

“Formasaun ida ne’e importante tebes liuliu ba atleta minoridade sira. Sira iha obrigasaun atu konklui formasaun edukasaun anti-doping, ho sertifikadu obrigatóriu antes halo partisipasaun iha Jogu CPLP. Sertifikadu ida ne’e sei hetan husi organizasaun mundiál anti-doping (WADA),” dehan Cesarino da Silva.

Nia mós deklara katak obrigasaun no padraun ne’e la’ós de’it ba Jogu CPLP, maibé iha kontinuasaun atu prepara atleta sira ba partisipasaun futura, inklui ASEAN Games no ASEAN Para Games ne’ebé sei hala’o iha tinan 2025/2026. “Kestaun dopajen sei sai prioridade ba atleta sira iha kualkér eventu desportivu mundiál,” nia akresenta.

Formasaun ne’e envolve atleta ho totali ema nain 40  husi modalidade oioin hanesan Taekwondo, Xadrez, Voleiból, Basketból, Futeból, Ténis Kampu, Voleiból Praia, Atletizmu (Lansamentu Pezu no Saltu Komprimentu), inklui mós treinadór sira.

Inisiativa ida ne’e hatudu kompromisu KND no MJDAK atu garante integridade desportiva Timor-Leste nian, liuliu iha preparasaun ba kompetisaun internasionál tuir padraun mundiál.

#MídiaMJDAK