DÍLI, 14 Juñu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, sabadu ne’e ofisialmente loke BNCTL Cup ba dala XIV tinan 2025. Kompetisaun futsal ne'e realiza iha kampu futsal Bebora, Díli.

Iha diskursu abertura, Ministru Nelyo Isaac Sarmento (NIS) hato'o agradesimentu boot ba Banku Nasionál Komérsiu Timor-Leste (BNCTL) ba inisiativa ne'ebé hatudu dedikasaun boot ba dezenvolvimentu desportu nian. "Dezenvolvimentu iha área desportu la'ós de'it hein Governu, maibé kontribuisaun boot husi setór privadu hanesan BNCTL ne'e importante tebes atu tempu ikus mai bele hetan atleta sira ne'ebé di'ak, hodi reprezenta ita-nia Estadu," dehan Ministru.

Ministru mós salienta importánsia husi investimentu estratéjiku ba foin-sa'e sira ne'ebé kompete iha desportu, tanba ida-ne'e fó orgullu ba nasaun. Ministru NIS mós hatutan katak desportu nu'udar meiu ida atu hametin koezaun nasionál no importante tebes ba jerasaun tuir mai.

"Ami espera katak inisiativa husi BNCTL ida-ne'e bele motiva setór privadu sira seluk atu iha vontade di'ak liután no koopera ho Estadu hodi halo eventu desportiva barak liután iha ita-nia rain, nune'e fó oportunidade ba Governu atu foka hodi investe di'ak liután ba ita-nia infraestrutura desportu nian iha Timor laran tomak," nia afirma. Ministru mós konvida partisipante hotu atu partisipa ho haksolok no aproveita eventu ne'e nu'udar meiu ida hodi halo ezersísiu, atu hadook án husi moras oioin. "Mai ita hamutuk lori Desportu ba mundu," nia konklui.

Iha okaziaun hanesan, Prezidente Konsellu Administrasaun no Prezidente Komisaun Ezekutiva BNCTL, Sr. Marcelo da Cruz Carvalho, esplika katak jogu futsal ne'e la'ós de'it kona-ba kompetisaun no prémiu, maibé importante liu maka atu hametin lasu amizade entre instituisaun no individu. "Objetivu prinsipál maka atu promove talentu liuhusi jogu animasaun ida-ne'e, no atu nafatin disiplina iha jogu bele kontribui ba ita-nia saúde di'ak ba individu ida-idak nian," nia dehan.

Sr. Marcelo da Cruz Carvalho mós esplika katak jogu ne'e la'ós atu buka prémiu, maibé prémiu sira ne'e nu'udar valór ida no insentivu ba jogadór sira hotu. BNCTL sei fó insentivu ho montante $5.000 ba ekipa klase Primeiru (feto no mane), $3.000 ba klase Segundu (feto no mane), no $2.000 ba klase Terseiru (feto no mane). Kompetisaun ne'e mós realiza nu'udar parte ida husi aniversáriu BNCTL nian, atu hakbesik servisu bankária ba sosiedade no komunidade. Nia husu ba jogadór sira hotu atu kontinua joga ho fair play, ho onestidade no amizade, atu labele estraga jogu amizade ida-ne'e ho interese seluk.

#MídiaMJDAK