Díli, 26 Maiu 2025 – Ministériu Juventude, Desportu, Arte no Kultura (MJDAK), liideradu husi Sua Exelénsia Ministru Nelyo Isaac Sarmento, akompaña husi Sua Exelénsia Sekretáriu Estadu Arte no Kultura (SEAK), Jorge Soares Cristovão, distribui ekipamentu treinu ba atleta nasionál sira, hanesan preparasaun ba Jogos Desportivos da Comunidade dos Países de Língua Portuguesa (CPLP) ne’ebé sei akontese iha Timor-Leste iha loron 17-27 fulan Jullu tinan 2025. Serimónia fahe ekipamentu ne’e hala’o iha Hotel Remelau, Ai-Mutin, Díli.

Distribuisaun ekipamentu hala’o diretamente husi Ministru Nelyo ho SEAK Jorge Soares Cristovão. Partisipante sira inklui Diretóra Jerál Servisu Korporativu, Xefe Gabinete, kargu xefia, funsionáriu MJDAK, no atleta nasionál ho sira-nia treinadór sira.

Iha nia diskursu, Ministru Nelyo Isaac Sarmento (NIS) hateten “Preparasaun ne’e importante tebes ba seleksaun nasionál nian. Jogos CPLP mak plataforma internasionál ida ba labarik tinan 16 mai kraik atu representa ita-nia bandeira. Ekipamentu ida ne’e, maski simples, mak prova katak governu fó prioridade ba ita-nia jerasaun foun.”

Ministru rekoñese mos katak iha atrazu oituan kona-ba konsentrasaun atleta iha sentru treinamentu no ekipamentu limitadu, maibé esforsu halo atu fó kondisaun minimu ba treinu.

Ekipamentu sira-ne’e fó ba modalidade sira hanesan Karate-Do, Tenis do Kampu, Taekwondo, Futebol, Xadrez, Vólei Praya, Basketbol 3x3, Atletizmu no Modalidade Paralímpiku.

Notisia Relevante : https://mjdac.gov.tl/notisia/detail/7647966b7343c29048673252e490f736/

Ministru Nelyo mós subliña “Jogos CPLP la’os deit responsabilidade governu, maibé responsabilidade kolektivu ba rai, atu prova katak Timor-Leste bele sai anfitrião di'ak. Investimentu ba atleta sira mak preparasaun ba futuru nian.”

Ministru fó apelu ba governu no komunidade atu kontinua fó atensão ba investimentu iha infraestrutura bázika desportiva, atu bele sustenta treinamentu no dezenvolvimentu jerasaun atleta profisionál.

“Ita-nia alvu prinsipál mak forma labarik sira ba sai atleta nasionál ne’ebé bele kompetitivu iha nivel CPLP. Ekipamentu ida ne’e ba treinu de’it, no ba loron kompetisaun sei prepara fali atributu seluk ne’ebé di'ak liu,” NIS konklui.

#MídiaMJDAK